नाशिक / देवळाली कॅम्प : नाशिक तालुक्यातील ग्रामीण भागात कॅन्टोन्मेंट बोर्डाच्या रुग्णालयाशिवाय इतर सुविधा नाहीत. अशात, बोर्डाच्या रुग्णालयात जागेचा प्रश्न सोडविण्यासाठी कोविड रुग्णांकरिता मंगल कार्यालय प्रशासनाला देण्याची तयारी पाळदे कुटुंबीयांनी दाखविली आहे. त्यामुळे पंचक्रोशीतील नागरिकांनी जिल्हा प्रशासनाकडे कोविड सेंटर उभारण्याची मागणी केली आहे. 

ग्रामीण रुग्णांसाठी लहवितच्या पाळदे कुटुंबाचा स्वतःहून पुढाकार 
देवळाली कॅम्प परिसरात कोविड रुग्णांची संख्या दिवसेंदिवस वाढतच असून, अनेक रुग्णांना उपचाराकरिता खासगी दवाखान्यांकडे धाव घ्यावी लागत आहे. देवळाली कॅम्प व पंचक्रोशीतील दोनशेपेक्षा जास्त रुग्ण शहर, नाशिक रोडसह ठिकठिकाणी उपचार घेत आहेत. कोविड रुग्णांनी कॅन्टोन्मेंट बोर्डाला दवाखान्याबाबत विचारणा केल्यानंतर जागा नसल्याने घरी अथवा अन्यत्र राहण्याची सूचना देण्यात येते. भगूर-लहवित मार्गावर अष्टविनायक लॉन्स असून, जवळ कोणतीही नागरी वस्ती नाही. दोन एकरांपैकी ३० गुंठ्यांवर असलेल्या मोठ्या शेडमध्ये शंभर रुग्णांची राहण्याची व्यवस्था होऊ शकते.

हेही वाचा > संतापजनक! कोरोनाबाधित महिलेचा सफाई कर्मचाऱ्याकडून विनयभंग; घटनेनंतर रुग्णालयात खळबळ

देवळाली कॅम्पसह भगूर, लहवित, लोहशिंगवे, वंजारवाडी, राहुरी, दोनवाडे, संसरी, शेवगेदारणा, बेलतगव्हाण आदी गावांना जोडणाऱ्या मुख्य रस्त्यावर असल्याने रुग्णांच्या घरातील सदस्यांसह आरोग्य प्रशासनाला सोयीस्कर ठरणार आहे. वाहतुकीच्या दळणवळणाच्या सुविधा सोयीस्कर उपलब्ध होऊ शकत असल्याने अष्टविनायक लॉन्स कोविड सेंटरसाठी घ्यावे याकरिता जिल्हा प्रशासनाला पत्र देणार असल्याचे संचालक वैभव पाळदे यांनी सांगितले. 

हेही वाचा > ह्रदयद्रावक! मोबाईल मिळेना म्हणून भितीपोटी विद्यार्थीनीची आत्महत्या; ऑनलाइन शिक्षणाचा आणखी एक बळी

मुख्यमंत्र्यांना साकडे 
कोविड रुग्णांची वाढती संख्या लक्षात घेता जिल्हा प्रशासनाने देवळालीसह पंचक्रोशीकरिता शंभर खाटांचे कोविड सेंटर उभारणे गरजेचे आहे. शासनाच्या आरोग्य विभागाला याबाबत मागणी पूर्वीच केली असून, अष्टविनायक लॉन्स येथे तातडीने सेंटर उभारावे याकरिता मुख्यमंत्र्यांशी फोनकरून मागणी केल्याचे माजी आमदार योगेश घोलप यांनी सांगितले.  

संपादन - ज्योती देवरे