नाशिक : कोरोना विषाणूचा प्रादुर्भाव लक्षात घेता राज्य शासनाने महाविद्यालयीन स्तरावरील परीक्षा रद्द ठरविल्या होत्या. परीक्षाच झालेली नसल्याने निकालही प्रलंबित होते. आता सावित्रीबाई फुले पुणे विद्यापीठाने शैक्षणिक वर्ष 2019-20 मधील दुसऱ्या सत्रातील पदवी व पदव्युत्तर अभ्यासक्रमाच्या निकालाचे गणितीय सूत्र निश्‍चित केले आहे. त्यानुसार प्रथम ते अंतीमपूर्व परीक्षांचा निकाल जाहीर करण्याचा मार्ग मोकळा झाला आहे.अंतीम वर्ष, अंतीम सत्रातील विद्यार्थ्यांच्या परीक्षा होणार नसल्याचे यापूर्वीच जाहीर केलेले असले तरी अशा विद्यार्थ्यांना निकालासाठी प्रतिक्षा करावी लागणार आहे. अंतीम वर्ष, अंतीम सत्राच्या विद्यार्थ्यांच्या निकालाचे सूत्र विद्यापीठ लवकरच जारी करेल, असे स्पष्ट केले आहे.

समितीच्या शिफारशी शासनाने केले स्वीकृत

पुणे विद्यापीठाच्या परीक्षा व मूल्यमापन मंडळाचे संचालक महेश काकडे यांनी पुणे, नाशिक व नगर जिल्ह्यातील सर्व संलग्न महाविद्यालयाच्या प्राचार्य, संचालकांना यासंदर्भात पत्र पाठवत माहिती कळविली आहे. त्यानुसार प्रथम वर्ष ते अंतीमपूर्व परीक्षांच्या निकालाचे गणितीय सूत्र निश्‍चित केले असल्याचे नमूद केले आहे. कोरोनाच्या पार्श्‍वभुमिवर लॉकडाऊन काळात सर्व अकृषी विद्यापीठाच्या शैक्षणिक वेळापत्रकांचे नियोजन करणे व परीक्षांकरीता एक सामाई योजना करण्यासाठी समिती गठीत केली होती. या समितीच्या शिफारशी शासनाने स्वीकृत केले होते.

ग्रेड मुल्यमापनावर आधारीत

त्यानुसार अंतीम वर्षातील विद्यार्थी वगळून पदविका, पदवी व पदव्युत्तर अभ्यासक्रमाच्या विद्यार्थ्यांना मिळणारी ग्रेड ही 50 टक्‍के अंतर्गत मुल्यमापनावर आधारीत आणि 50 टक्‍के पूर्वीच्या सत्रांतील परीक्षेचे गुण (उपलब्ध असल्यास) घेऊन ठरविली जाणार आहे. त्याकरीता विद्यापीठाच्या परीक्षा विभागाने तयार केलेल्या गणितीय सूत्रास विद्यापरीषद, परीक्षा व मूल्यमापन मंडळ, व्यवस्थापन परीषद या विद्यापीठाच्या अधिकार मंडळांनी मान्यता दिलेली आहे. त्यानुसार प्रथम ते अंतीमपूर्व परीक्षांचे निकाल जाहीर करण्यात येणार असल्याचे स्पष्ट केले आहे.

हेही पाहा> VIDEO : मुलाच्या विवाहाचा आनंद..अन् विधानसभा उपाध्यक्षांच्या नृत्याची झलक..एकदा बघाच!

परीपत्रकातील महत्त्वाच्या बाबी-
- प्रथम ते अंतिमपूर्वी वर्षातील सम (2,4,6) सत्रातील विद्यार्थ्यांचे मूल्यमापन केले जातील. विषम सत्रांतील विद्यार्थ्यांच्या निकालाचे मूल्यमापन केले जाणार नसून, अशा सत्रांची परीक्षा परीस्थितीचे आकलन करून घेतली जाईल.
- अंतीम वर्ष, अंतीम सत्रातील विद्यार्थ्यांची परीक्षा घेतली जाणार नाही. अशा विद्यार्थ्यांच्या निकालासाठीचे सूत्र लवकरच कळविले जाईल.
- बॅकलॉक आणि रिपीटर विद्यार्थ्यांचा निकाल जाहीर केला जाणार नाही. अशा विद्यार्थ्यांची परीक्षा परीस्थिती सुधरल्यानंतर घेतली जाणार आहे.

हेही पाहा> ह्रदयद्रावक "...पण पप्पा तर खूप दूर निघून गेले" या वाक्याने सर्वांचेच पाणावले डोळे