नाशिक : अनुदानित व विनाअनुदानित अभ्यासक्रमांसाठी जाहीर केलेली शुल्कवाढ सावित्रीबाई फुले पुणे विद्यापीठाने अखेर स्थगित केली आहे. कोरोनामुळे निर्माण झालेल्या परिस्थितीत शुल्कवाढ मागे घ्यावी, असे पालक-विद्यार्थ्यांचे मत असल्याचे वृत्त "सकाळ'मध्ये प्रसिद्ध झाले होती. त्याची दखल घेत विद्यापीठाने शुल्कवाढीच्या निर्णयाला स्थगिती दिली असून, विद्या परिषदेच्या या निर्णयास व्यवस्थापन परिषदेची मंजुरी घेऊन अंतिम निर्णय जाहीर केला जाणार आहे. 

व्यवस्थापन परिषदेची भूमिकादेखील महत्त्वाची...

विद्यापीठाच्या विद्या परिषदेची (ऍकॅडमी कौन्सिल) बैठक शनिवारी (ता. 23) झूम ऍपद्वारे झाली. सध्याच्या परिस्थितीविषयी चर्चा करताना अन्य विविध विषयांवर या बैठकीत चर्चा झाली. कोरोना विषाणूमुळे निर्माण झालेल्या परिस्थितीमुळे आर्थिक संकट ओढावलेले आहे. अशा स्थितीत विविध अभ्यासक्रमांची नियोजित शुल्कवाढ विद्यार्थ्यांच्या दृष्टीने अडचणीची ठरू शकते. त्यामुळे शैक्षणिक वर्ष 2020-21 मध्ये जाहीर केलेली शुल्कवाढ मागे घेण्यासंदर्भात बैठकीत चर्चा झाली. त्यानुसार शुल्कवाढीला स्थगिती देण्याचा प्रस्ताव व्यवस्थापन परिषद (मॅनेजमेंट कौन्सिल) पुढे सादर केला जाणार आहे. शुल्कवाढ स्थगितीची प्रक्रिया पूर्ण होण्यासाठी व्यवस्थापन परिषदेची भूमिकादेखील महत्त्वाची असेल. दरम्यान, विद्या परिषदेने शुल्कवाढीला स्थगिती दिल्याने आता व्यवस्थापन परिषदेतही शुल्कवाढ स्थगित करण्यावर जवळपास शिक्‍कामोर्तब झालेले आहे. 

हेही वाचा > धक्कादायक! ''हे' रुग्णालय फक्त कोरोना रुग्णांसाठीच'...म्हणून रुग्णाला पाठविले माघारी...अन् अखेर

आगामी शैक्षणिक वर्षात विद्यापीठातर्फे नियोजित शुल्कवाढीच्या स्थगितीचा प्रस्ताव विद्या परिषदेकडून प्राप्त झाल्यास, व्यवस्थापन परिषद याबाबत विचार करेल. सध्या कोरोना विषाणूच्या संसर्गामुळे कुठलाही विद्यार्थी शिक्षणापासून वंचित राहणार नाही, याची खबरदारी विद्यापीठ निश्‍चित घेईल. शुल्कवाढीला स्थगिती मिळाल्यास विद्यार्थी-पालकांना दिलासा मिळेल. - विजय सोनवणे, सदस्य, व्यवस्थापन परिषद  

हेही वाचा > विरोध डावलून 'इथं' त्यांची मनमानी सुरूच...इतका अट्टाहास का?...रंगतेय चर्चा!