नाशिक / म्हसरूळ : कोरोना संकटाच्या काळात शहरात आणखी एक धक्कादायक घटना रविवारी (ता. 12) पुढे आली. यात म्हसरूळ येथील एका क्वारंटाइन असलेल्या कुटुंबातील एक महिला चक्क भाजी बाजारात भाजी विक्री करताना आढळल्याने परिसरात खळबळ उडाली आहे. 

काय घडले नेमके?

कोरोना संकटाच्या काळातील या धक्कादायक प्रकारामुळे परिसरात खळबळ उडाली. म्हसरूळ गाव परिसरात दोन दिवसांपूर्वी एका कुटुंबातील महिलेचा कोरोना अहवाल पॉझिटिव्ह आला होता. संबंधित महिलेवर सध्या महापालिकेच्या झाकिर हुसेन रुग्णालयातील कोविड सेंटरमध्ये उपचार सुरू असून, त्यांचे संपूर्ण कुटुंब चौदा दिवसांसाठी क्वारंटाइन करण्यात आले आहे. मात्र, असे असतानाही या कुटुंबातील एक महिला रविवारी (ता. 12) चक्क मंडईत भाजी विक्रीसाठी आल्याचे आढळले. विशेष म्हणजे, संबंधित कुटुंबीय राहात असलेला भाग मनपा व पोलिस प्रशासनाने प्रतिबंधित म्हणून सील केलेला आहे. मात्र, अशा बिकट परिस्थितीत उत्पन्नाचे दुसरे कोणतेही साधनच नसल्याने सकाळी अकराच्या सुमारास ही महिला नाईलाजाने म्हसरूळच्या भाजी विक्री करण्यासाठी आली.

हेही वाचा > खून झालेल्या युवकावर बलात्काराचा गुन्हा..? युवती गर्भवती राहिल्याने झाला खुलासा

भाजी मंडई नियोजन कक्षापर्यंत ही वार्ता पोचताच, या महिलेला सूचना देऊन घरी पाठविण्यात आले. तसेच, मनपाचे आरोग्य पथक व पोलिस पथकाच्या सहाय्याने संबंधित महिलेच्या घरी व परिसरातही आवश्‍यक सूचना देण्यात आल्या. म्हसरूळ भाजी मंडई नियोजन कक्षाचे अधिकारी भूषण देशमुख, प्रकाश उखाडे, म्हसरूळचे पोलिस उपनिरीक्षक श्री. पवार, कॉन्स्टेबल श्रीमती टोंगारे, मनपाच्या मदतीसाठी असलेल्या एकात्मिक बालविकास प्रकल्प नागरी नाशिक-2 च्या पुष्पा वडजे आदींनी या सूचना दिल्या.

हेही वाचा > ‘आम्ही पोलिस आहोत’ असा विश्वास दाखवला..अन् निवृत्त एसटी कर्मचाऱ्यासोबत केले असे..

उत्पन्नाचे साधनच हिरावले गेले म्हणून...

कुटूंबातील सदस्याचा कोरोना अहवाल पॉझिटिव्ह आल्याने संपूर्ण कुटूंबच क्वारंटाईन झाले. परिसरही प्रतिबंधित झाला. परिणामी उत्पन्नाचे साधनच हिरावले गेले. अशा परिस्थितीत दुसरा पर्यायच न उरल्याने म्हसरूळ येथील एका महिलेने क्वारंटाईन झुगारून थेट मंडईत येऊन आपला मुळ भाजी विक्रीचा व्यवसाय सुरू केला.