Nashik Crime : इंदिरानगर पोलिस ठाणे हद्दीत वडाळा येथील शंभर फुटी रस्त्यावर असलेल्या म्हाडा बिल्डिंग परिसरात १५ डिसेंबरला मध्यरात्री दीडच्या सुमारास गोळीबार झाल्याची आणि यात तत्कालीन पोलिस आयुक्तांनी स्थापन केलेल्या पोलिसांच्या विशेष पथकातील कर्मचाऱ्याचाच समावेश असल्याची जोरदार चर्चा सोशल मीडियावर झाल्याने पोलिस विभाग हादरला आहे.

सिडकोमधील गोळीबाराच्या घटनेच्या दोन दिवसांनीच हा प्रकार झाल्याचे समोर येत असल्याने घटनेचे गांभीर्य अधिक वाढले आहे. (question about Police personnel involved in shooting in Wadala area nashik news)

त्या दिवशी चार ते पाच जणांच्या टोळक्यांपैकी एकाने हवेत गोळीबार केल्याची घटना घडल्याचे समजते. त्या गोळीबाराच्या घटनेबाबत कोणत्याही प्रकारचा गुन्हा दाखल नव्हता. याच कारणावर शुक्रवारी (ता. २२) सायंकाळी पुन्हा वडाळा व पाथर्डी परिसरात संशयितांमध्ये बाचाबाची झाल्याने तो गोळीबार झाल्याची माहिती इंदिरानगर पोलिस ठाण्यात पोचली.

घटनेचे गांभीर्य बघून पोलिस उपायुक्त मोनिका राऊत, सहाय्यक आयुक्त शेखर देशमुख हेदेखील पोलिस ठाण्यात पोचले. या प्रकरणी इंदिरानगर पोलिसांनी काही संशयितांना ताब्यात घेतले आहे.

यात पोलिस कर्मचाऱ्यांचाच समावेशासंदर्भात उपायुक्त राऊत यांना विचारले असता, त्यांनी सांगितले, की याबाबत सखोल चौकशी चालू असून, कुणी, कसा व कुठे गोळीबार केला हे तपासले जात आहे. सकाळपर्यंत याबाबत सर्व चित्र स्पष्ट होईल. त्यानंतर रीतसर गुन्हा दाखल करून पुढील कारवाई करण्यात येईल.

दरम्यान, रात्री सव्वादहाच्या सुमारास म्हाडा बिल्डिंगजवळ अज्ञात दहा-पंधरा जणांनी जात तेथे दमबाजी करत या प्रकरणात कुणी काही साक्ष दिली तर आमच्याशी गाठ आहे, असा दम दिल्याची चर्चा परिसरात सुरू होती.