नाशिक : एनडीएमव्हीपी महाविद्यालयात शिक्षण घेत असलेला रावेर येथील रुपेश हा भावासोबत नाशिकमध्येच अडकला. लॉकडाऊनमुळे जेवणाचे हाल होऊ लागले. अन् खोलीतच बंद असल्याने नैराश्य अन् ताणतणाव वाढला..मग त्याने घेतला असा निर्णय की सगळ्यांनाच धक्का बसला.
 

असा घडला प्रकार

रुपेश भरत पाटील (वय २२) असे या मुलाचे नाव आहे. अधिक माहिती अशी की, रावेर येथील पाल रोडवर श्रीराम पाटील यांच्या फॅक्ट्रीमध्ये वास्तव्यास असलेल्या भरत पाटील यांची दोन्ही उच्च शिक्षणासाठी नाशिक येथे राहतात. दोघाही मुलांची नावे मयूर व रुपेश पाटील असे असून ते शहरातीलच एनडीएमव्हीपी महाविद्यालयात शिक्षण घेत होते. कोरोना व्हायरसच्या शिरकावानंतर सर्वत्र संचारबंदी लागू करण्यात आली. यामुळे महाविद्यालयीन शिक्षण घेणारे अनेक विद्यार्थी जिल्हाबंदी केल्यामुळे शहरात अडकून पडले आहेत. यातीलच रुपेश एक होता. त्याचे जेवणाचे हाल होत असल्याचे त्याच्या नातेवाईकांना समजले. यानंतर त्याच्या नातेवाईकांनी पोलिसांची परवानगी मिळण्यासाठी प्रयत्न केले. मात्र, पोलिसांनी परवानगी नाकारल्याने हा विद्यार्थी तणावात होता.

हेही वाचा > ह्रदयद्रावक! आई कुठे शोधू तुला गं? लॉकडाऊनमध्ये आईला भेटण्याची धडपड ह्रदय हेलावणारी! 

तर रुपेशने असे पाऊल उचलले नसते...

अखेर आज सकाळी ११ वाजेच्या सुमारास त्याने राहत्या खोलीत आत्महत्या केल्याची दुर्दैवी घटना घडली. या मुलाचा मृतदेह जिल्हा रुग्णालयात शवविच्छेदन करून त्याच्या मूळगावी आणला. रुपेशच्या वडिलांनी त्याला घरी आणण्याबाबत जळगाव पोलीस अधीक्षक यांच्याकडे अर्ज केला होता. मात्र त्यांनी परवानगी नाकारल्यामुळे रुपेशला नाशिकलाच थांबावे लागले. जर ती परवानगी मिळाली असती तर रुपेश वाचला असता असं बोललं जातंय.

हेही वाचा > 'या' क्षेत्राव्यतिरिक्त अत्यावश्‍यक सेवांवरील वेळेचे बंधन मागे; जिल्हाधिकाऱ्यांचा आदेश