गणूर : श्री रामप्राणप्रतिष्ठा सोहळा होत असताना विविध माध्यमांतून कलावंत श्रीरामाला अभिवादन करत आहे. फुलेनगर चांदवड येथील हर्षदा नितीन खुटे यांनी देखील असेच अनोखं अभिवादन केले.

तांदूळ, हळदीचा वापर करत आकर्षक अशी श्रीरामाची प्रतिकृती साकारली. ही प्रतिकृती बघण्यासाठी परिसरातील अनेक नागरिकांनी खुटे यांच्या घरी भेट दिली. (replica of Shri Ram made using rice and turmeric unique greeting from Harshada Khunte Nashik News)

कामाचा व्याप, घरगाड्याचे नियोजन करताना अनेक गृहिणी आपल्या जन्मजात कलेला सिद्ध करण्यात मुकतात. हर्षदा याला मात्र अपवाद ठरल्या. एक वर्षाच्या लहानग्या मुलाला सांभाळत तीन दिवस मिळेल तसा वेळ काढत हर्षदा यांनी ही कलाकृती साकारली.

यासाठी १ किलो तांदूळ तसेच हळदीचा रंग म्हणून वापर करण्यात आला आहे. यासाठी ६१ बाय ६१ सेमी आकाराची जागा वापरण्यात आली आहे. तांदळाचा एक एक दाणा ठेवताना तसेच श्री रामाचे आकर्षक रूप जपताना कलेचा कस लागला.

गृहिणी संसारगाडा सांभाळत आपली कला जोपासू शकतात त्यांच्यासाठी हर्षदा या आदर्श म्हणून ठरत आहे. त्यांच्या उपक्रमाचे परिसरातून कौतुक होत आहे.