नाशिक : नाशिक शहरात चिनी नायलॉन मांजा (Chinese nylon manja) वापरास प्रतिबंध करणारा आदेश शहर दंडाधिकारी व पोलिस आयुक्त दीपक पांडे (CP Deepak Pandey) यांनी लागू केला आहे. त्यामुळे पतंग उडविण्यासाठी नायलॉन मांजा वापरल्यास गुन्हे दाखल होणार आहेत.

नायलॉन मांजाने घेतलेत निष्पापांचे बळी

जानेवारी महिन्यात मकर संक्रातीला तिळगुळ देण्यासोबत पतंग उडवण्याला बहर येतो. या काळात शहरात पतंग उडविण्याच्या छंदापायी अनेक दुचाकी वाहनचालकांचे आणि मुक्या पक्ष्यांचे बळी गेले आहेत. नायलॉन कोटींगच्या टोकदार मांजा गळ्याभोवती आवळला गेल्याने चालू वाहनावर पडून महिला आणि पुरुष वाहनधारकांचे जीव गेले आहेत. दरवर्षी घडणाऱ्या या अघटित घटनांच्या पार्श्वभूमीवर पोलिस आयुक्तांनी पतंग उडविण्यासाठी नायलॉन दोरा, चायनीज मांजा यांच्या निर्मिती, साठा आणि वापरावर बंदी घातली आहे. मंगळवारी (ता. ४) मध्यरात्री पासून ३१ जानेवारीपर्यत चायनीज आणि नायलॉन मांजा वापराला प्रतिबंध केला आहे.

...तर तुरुंगवास

प्रतिबंध असलेला नॉयलॉन मांजा वापराच्या आदेशाचे उल्लंघन झाल्याचे आढळल्यास महाराष्ट्र पोलिस अधिनियम १९५१ कलम (१३५) (१) नुसार गुन्हा दाखल होऊन एक वर्षाच्या कैदेची शिक्षेची तरतूद आहे. पोलिस आयुक्तांनी शहरातील सगळ्या पोलिस ठाण्यांना आदेशानुसार कारवाईचे आदेश जारी केले आहेत.