चांदवड (जि.नाशिक) : मुख्याध्यापिकेने चक्क चालकाशी संगनमत करून पोषण आहारातील पंधरा क्विंटल तांदूळ शाळेत न आणता परस्पर उतरवून घेतल्याचे स्पष्ट झाले. ही कुणकुण संस्थेच्या कार्यकारी मंडळाला लागल्यानंतर मुख्याध्यापिका विद्यार्थ्यांना पोषण आहाराचे वाटप करीत असतानाच धाड टाकली. आणि मग...

मुख्याध्यापिका कि वैरिण! 

चांदवड येथील श्री नेमिनाथ जैन संस्थेच्या प्राथमिक शाळेच्या मुख्याध्यापिकेने शालेय पोषण आहारातील पंधरा क्विंटलचा अपहार केल्याचे स्पष्ट झाल्याने संस्थेच्या मॅनेजमेंट कमिटीने मुख्याध्यापिका जयश्री गोळेचा-लाख यांना रंगेहाथ पकडून तत्काळ निलंबित केले. तर गलेलठ्ठ पगार असतानाही गरिबांच्या मुलांच्या घशातील तांदूळ चोरल्याने पालकांमध्ये तीव्र संताप असून, या मुख्याध्यापिकेसह संबंधितांवर चोरीचा गुन्हा दाखल करण्याची मागणी होत आहे. 

मुख्याध्यापिका कि वैरिण; चालकाशी संगनमत करून केली गफलत

नेमिनाथ जैन संस्थेच्या अनुदानित श्री नेमिनाथ जैन प्राथमिक विद्यामंदिर शाळेत एकूण ८३४ विद्यार्थी शिकतात. या सर्व विद्यार्थ्यांना शालेय पोषण आहार दिला जातो. सध्या कोरोनाच्या पार्श्र्वभूमीवर या सर्व विद्यार्थ्यांना पोषण आहार व शिजवत वाटप होतो. नेहमीप्रमाणे पोषण आहारातील तांदळाचा पुरवठा करणाऱ्या तिरुपती सप्लायर एजन्सीचे वाहन (एमएच १४, एएच ६९१०)चालकाने संस्थेच्या प्राथमिक शाळेत पोषण आहारातील तांदूळ आणला. त्याने पन्नास किलो वजनाच्या ७१ गोण्या उतरवल्या. वास्तविक, नियमानुसार पन्नास किलो वजनाच्या १०१ गोणी तांदूळ शाळेत पुरवठा करावयास हवा होता. असं असतानाही या मुख्याध्यापिका जयश्री गोळेच्या यांनी संबंधित चालकाला १०१ गोणी शाळेत या एजन्सीने पुरवठा केल्याची पोचपावती दिली. यावरून या मुख्याध्यापिकेने चालकाशी संगनमत करून पोषण आहारातील पंधरा क्विंटल तांदूळ शाळेत न आणता परस्पर उतरवून घेतल्याचे स्पष्ट झाले.

कुणकुण मंडळाला लागल्यानंतर टाकली धाड

ही कुणकुण संस्थेच्या कार्यकारी मंडळाला लागल्यानंतर मुख्याध्यापिका विद्यार्थ्यांना पोषण आहाराचे वाटप करीत असतानाच धाड टाकली. या वेळी एका विद्यार्थ्याला सहा किलो तांदळाचे वाटप करणे अपेक्षित असताना प्रत्यक्षात एका विद्यार्थ्याला चार ते साडेचार किलोच तांदूळ वाटप करीत असल्याचे निदर्शनास आले. मुख्याध्यापिकेने कार्यकाळात आणखी काही गैरव्यवहार केले आहेत का, हे तपासण्यासाठी संस्थेने चौकशी सुरू केली आहे. 
 

हेही वाचा > शेडनेट पंजाच्या सहाय्याने फाडून आत शिरण्यात बिबट्या अयशस्वी; तरीही डाव साधलाच

प्राथमिक चौकशीत संबंधित शाळेच्या मुख्याध्यापिका जयश्री गोळेचा या दोषी आढळल्या आहेत. चौकशी सुरू असून, चौकशीअंती संबंधित संस्थेस मुख्याध्यापिकेविरुद्ध कारवाईबाबत नियमानुसार आवश्यक ते निर्देश देऊन कारवाईच्या सूचना दिल्या जातील. -राजेंद्र निकम, गटशिक्षणाधिकारी, चांदवड 

मुख्याध्यापिकेविरोधात विद्यार्थी व पालकांच्या काही तक्रारी प्राप्त झाल्या आहेत. त्यानुसार कारवाई होईल. संस्थेत गैरव्यवहार खपवून घेतला जाणार नाही. -झुंबरलाल भंडारी, जॉइंट सेक्रेटरी, नेमिनाथ जैन संस्था, चांदवड 

संबंधित निलंबित मुख्याध्यापिकेने वाहतूकदाराशी संगनमताने १५ क्विंटल तांदळाचा गैरव्यवहार केल्याचे प्राथमिक चौकशीत निदर्शनास आले आहे. असा गैरप्रकार कोणत्याही शाळेच्या बाबतीत खपवून घेणार नाही. अधिक पुरावे मिळाल्यास संस्थेला संबंधित मुख्याध्यापिकेविरुद्ध गुन्हा दाखल करण्याचे निर्देश दिले जातील. -श्रीधर देवरे, अधीक्षक, शालेय पोषण आहार योजना, जिल्हा परिषद नाशिक  

हेही वाचा > समाजकंटकाचेच षड्यंत्र! वाळलेले कांदारोप बघून शेतकऱ्याला धक्काच; अखेर संशय खरा ठरला