नाशिक : म्हसरुळ, पंचवटी परिसरामध्ये टवाळखोरांकडून धुडघूस घालण्याचे प्रकार सुरूच असून आणखी एक घटना समोर आली आहे. दिंडोरी रोडवर वडापाव विक्रेत्याला मारहाण व कोयत्याचा धाक दाखवून त्याच्या गल्ल्यातील 5 हजार रुपयांची रोकड बळजबरीने हिसकावून दहशत पसरविण्याचा प्रयत्न केल्याचा प्रकार घडला आहे. 

असा आहे प्रकार
 
प्रवीण गणपत काकड व एक साथीदार या दोघांविरोधात गुन्हा दाखल करण्यात आला आहे. चंद्रेश नरेंद्र हामंद (रा. हनुमान वाडी, पंचवटी) यांच्या फिर्यादीनुसार, हामंद यांचे दिंडोरी रोडवरील एमडी चायनीज दुकानासमोर श्री कृष्णा वडापाव सेंटर आहे. गेल्या मंगळवारी (ता.3) दुपारी साडेचार वाजेच्या सुमारास संशयित काकड व त्याचा साथीदार या दोघांनी त्यांच्या वडापाव सेंटरवर येऊन पार्सल घेतले. या पार्सलचे 136 रुपयांची मागणी केली असता, संशयित काकड याने चंद्रेश हामंद यांना शिवीगाळ करीत मारहाण केली. तसेच, त्याच्याकडील कोयता काढून धाक दाखविला आणि हामंद यांच्या गल्ल्यातील 5 हजार रुपये बळजबरीने काढून घेत वडापाव गाडीवरील सामानाचे नुकसान केले. तसेच, आरडाओरडा करीत कोयता दाखवून परिसरात दहशत पसरविली. 

हेही वाचा > मालकाच्या गल्ल्यावर ठेवला डोळा!...अन् गेला बाराच्या भावात

याप्रकरणी म्हसरुळ पोलिसात जबरी चोरीचा गुन्हा दाखल करण्यात आला असून गुन्ह्याचा तपास सहाय्यक निरीक्षक सुधीर पाटील हे करीत आहेत. दरम्यान, गेल्या आठवडाभरामध्ये तीन घटना घडल्या आहेत. त्यामुळे म्हसरुळ, दिंडोरी रोड, पेठरोड या परिसर दहशतीचे वातावरण आहे. 

हेही वाचा > सिंगापूरसह मलेशिया अन्‌ दुबईमधून नाशिकच्या कांद्याची चौकशी...!

हेही वाचा > शिक्षकांच्या बदल्या ऑनलाइन की ऑफलाइन?...कसा असेल नवा पॅटर्न...