नाशिक / दहीवड : माळवाडी (ता. देवळा) येथील धवळखडी मंदिर रस्त्यावर शंभर, दोनशेच्या एकूण दोन हजार रुपयांच्या नोटा आढळल्याने येथील शेतकऱ्यांमध्ये भीतीचे वातावरण निर्माण झाले आहे. नोटा 50 ते 60 फुटांपर्यंत पसरलेल्या अवस्थेत आढळल्याने हे नेमके आहे काय, असा प्रश्‍न शेतकरी, ग्रामस्थ, शेतमजुरांसमोर उभा आहे. 

असा घडला प्रकार
गुरुवारी (ता. 30) सायंकाळी शेतीकामे आटोपून घराकडे येत परतणाऱ्या शेतकरी व मेंढपाळांच्या निदर्शनास हा प्रकार आला. आजूबाजूच्या शेतकऱ्यांच्या लक्षात हा प्रकार आणून दिला. याबाबत पोलिसपाटील सुनील वाघ यांनी देवळा पोलिसांना माहिती दिली. हवालदार राठोड व तलाठी पुरकर यांनी घटनास्थळी दाखल होऊन नोटांची पाहणी केली. नागरिकांना घाबरण्याचे काहीही कारण नाही, असा विश्‍वास दिला. मात्र, नोटांना हात लावण्यासाठी कुणीही धजावले नाही. दरम्यान, पोलिसांनी सॅनिटायझर, हॅंडग्लोव्हज व चिमट्याच्या सहाय्याने त्या नोटा ताब्यात घेतल्या. कोरोना विषाणूची दहशत सर्वत्र पसरली असल्याने जाणीवपूर्वक नोटा टाकण्याचे काम अज्ञात व्यक्तीने केले असावे, अशी चर्चा सुरू आहे. नोटा बघण्यासाठी परिसरातील नागरिकांनी गर्दी केली होती. 

हेही वाचा > ह्रदयद्रावक! हळद लागली अन्‌ अक्षता रुसल्या! सप्तपदीच्या फेऱ्यांपूर्वीच नववधूचा संसार उद्‌ध्वस्त

कसमादे पट्ट्यात दुसरा प्रकार 
कसमादे परिसरातील हा दुसरा प्रकार आहे. 11 एप्रिलला सौंदाणे (ता. मालेगाव) येथेही अशाच प्रकारे नोटा रस्त्यावर आढळल्या होत्या.  

हेही वाचा > धक्कादायक! पिकअप गाडीवर नाव "जय बजरंग बली" अन् आत मात्र अंगावर काटा आणणारी गोष्ट..