मालेगाव कॅम्प (जि.नाशिक) : शासनाच्या निर्देशानुसार सोमवार (ता. ४)पासून नववी ते बारावीची शाळा सुरू झाली. ‘शाळेची बेल वाजली खरी, मात्र विद्यार्थी अजूनही घरी’ अशीच परिस्थिती मालेगाव शहरातील बहुतांश शाळांमध्ये पहिल्या दिवशी दिसली. 

मालेगावात शाळेची बेल वाजली, मात्र विद्यार्थी घरीच 
सर्व शाळांमध्ये परिसर वर्ग सॅनिटाइझ केले. विद्यार्थ्यांना प्रवेश देताना थर्मल स्क्रीनिंग, शारीरिक अंतर ठेवण्यात आले. काही शाळांनी विद्यार्थ्यांचे पुष्पगुच्छ देऊन स्वागत केले. दुबार पद्धती, सम-विषम, एक दिवसाआड टप्प्याटप्प्याने विद्यार्थी बोलावूनदेखील उपस्थितीचे प्रमाण अत्यल्प होते. विद्यार्थ्यांसह शिक्षक, शिक्षकेतर कर्मचाऱ्यांना मास्कचा वापर बंधनकारक करण्यात आला. एका बाकावर एक विद्यार्थी अशी बैठकव्यवस्था ठेवून ऑनलाइन व ऑफलाइन दोन्ही पद्धतीने शिक्षण सुरू आहे. अनेक विद्यार्थ्यांनी शाळा उघडल्याचा आनंद व्यक्त केला. महापालिकेचे प्रशासन अधिकारी फर्नांडिस चव्हाण यांनी काही शाळांना भेटी दिल्या. नियोजनानुसार बोलविलेल्या विद्यार्थ्यांचे प्रमाण माध्यमिकचे ४० ते ५० टक्के, कनिष्ठ महाविद्यालय विज्ञान शाखेचे प्रमाण ७० टक्के, वाणिज्य ५० टक्के, कला शाखेचे अवघे ३० टक्के विद्यार्थी उपस्थित होते. 

हेही वाचा > साईबाबांच्या दर्शनाची इच्छा अपूर्णच; बाईकवरून शिर्डीवर निघालेल्या तीन तरुणांवर काळाचा घाला

शिक्षकांची कोविड चाचणी नाही 
शिक्षकांची कोविडची चाचणी करणे अपेक्षित असताना शहरातील शिक्षकांची चाचणी झालेली नाही. महापालिका प्रशासनाने निधीचे कारण देत चाचणी घेणे सोयीस्कर टाळले असून, या संदर्भात शिक्षक संघटनांच्या पदाधिकाऱ्यांसह पालकांनी नाराजी व्यक्त केली.  

हेही वाचा >  निर्दयी मातेनेच रचला पोटच्या गोळ्याला संपविण्याचा कट; अंगावर काटा आणणारा संतापजनक प्रकार उघड