नाशिक/एकलहरे : गुजरात मधील नवसारी वीज वहन करणाऱ्या पारेषणच्या लाईन मध्ये दुरुस्तीचे काम निघाल्याने नाशिक औष्णिक वीज केंद्राचे महत्व पुन्हा एकदा अधोरेखित झाले आहे. महाराष्ट्र-गुजरात दरम्यान वीज वहन करणाऱ्या लाईनच्या दुरुस्तीसाठी परमिट घेण्यात आले आहे. त्यामुळे ग्रीड स्टेबिलिटीसाठी नाशिकचा आणखी एक संच सुरू करण्याचे निर्देश देण्यात आले आहेत. 

ऑक्टोबरमध्ये बारा तारखेला ग्रीड फेल झाल्याने मुंबईची बत्ती गुल झाली होती तेव्हा नाशिक औष्णिक वीज केंद्राचा एक संच सुरू करण्याची परवानगी देण्यात आली. नवसारी लाईनचे काम निघाल्याने आज मध्यरात्रीपर्यंत संच क्रमांक तीन सुरू करण्यात येणार असल्याची माहिती सूत्रांनी दिली. हा संच पंधरा नोव्हेंबर पर्यंत सुरू रहाणार आहे.

स्टेबिलिटीसाठी नाशिक महत्वाचे

नाशिक औष्णिक वीज केंद्राने आजवर आपली गुणवत्ता सिद्ध केली आहे. चाळिशीतले संच असल्याने वीज निर्मिती दर वाढलेले दिसून येतात किंवा आकडेवारी वाढवून दाखवली जाते. नवीन संच स्थापित झाल्यास त्याचा निर्मिती दर कमी येऊ शकतो. ग्रीड स्टेबिलिटीसाठी नाशिक महत्वाचे आहे हे वारंवार सिद्ध झाले आहे तरी नाशिकला डावलले जाते आहे हे विशेष आहे.

हेही वाचा > शेडनेट पंजाच्या सहाय्याने फाडून आत शिरण्यात बिबट्या अयशस्वी; तरीही डाव साधलाच

तर केंद्र बंद करण्याचा विचार सोडावा लागेल..

आजवर ज्या ज्यावेळी महानिर्मितीला वीज निर्मितीत अडचण आली आहे त्या त्या वेळी नाशिक औष्णिक वीज केंद्राच्या कामगार अभियंता यांच्यासह सर्व अधिकारी वर्गाने पूर्ण क्षमतेने वीज निर्मिती करून येथील चाळिशीतील संचांची गुणवत्ता सिद्ध केली आहे.
सध्या राज्यातील वीजेची मागणी ही वाढती दिसून येत आहे. आज राज्याची वीजेची मागणी १९ हजार ६०० होती तर राज्याच्या सर्व स्रोतातून १३ हजार ५०० मेगा वॅट वीज निर्मिती सुरू होती . भविष्यात वीजेची मागणी जर आणखी दोन अडीच हजार मेगा वॅट ने वाढली, तर येथील किमान २ संचांमधून वीज निर्मिती कायम सुरू राहील व भविष्यात नाशिक औष्णिक वीज केंद्र बंद करण्याचा विचार सोडावा लागेल असेच चित्र दिसते.

हेही वाचा > समाजकंटकाचेच षड्यंत्र! वाळलेले कांदारोप बघून शेतकऱ्याला धक्काच; अखेर संशय खरा ठरला

ग्रीड स्टेबिलिटीसाठी व दिवाळी सणाच्या पार्श्वभूमीवर मागणी वाढल्याने नाशिक औष्णिक वीज केंद्राचा दुसरा संच सुरू करण्यास परवानगी देण्यात आली आहे.
- मोहन आव्हाड, प्रभारी मुख्य अभियंता