नाशिक : निर्यातबंदीविरोधात शेतकरी आंदोलनाच्या निमित्ताने नाशिकमध्ये आलेले राष्ट्रवादी काँग्रेसचे अध्यक्ष शरद पवार यांची शिवसेना (उद्धव ठाकरे गट) नेत्यांनी भेट घेतली. नाशिक व दिंडोरी लोकसभेबाबत उभयतांमध्ये प्राथमिक चर्चा झाल्याचे समजते.

पवार व सेना नेत्यांच्या भेटीने महाविकास आघाडीची नाळ अधिक घट्ट बांधली जात असल्याचे दिसून आले. (Shiv Sena leader meets Sharad Pawar Discussion regarding Nashik Dindori site in Mahavikas Aghadi political)

येत्या काही महिन्यांत लोकसभा निवडणुकीची रणधुमाळी सुरू होणार आहे. त्यादृष्टीने आतापासूनच रणनीती आखली जात आहे. महाविकास आघाडीत शिवसेना (उद्धव ठाकरे) यांच्या गटाकडे नाशिक लोकसभेची जागा दिसून येते.

राष्ट्रवादी (शरद पवार गटा)कडे दिंडोरीची जागा आहे. अद्याप जागावाटप झालेले नसले तरी महाविकास आघाडीचा धर्म म्हणून शिवसेनेच्या नेत्यांनी सोमवारी शरद पवारांची भेट घेतली.

त्यांचे नाशिकमध्ये स्वागत केले. शहरातील राजकीय परिस्थिती, ग्रामीण भागातील वातावरण याविषयी गप्पा मारत त्यांनी आगामी निवडणुकांमध्ये काय ‘ट्रेंड’ असेल याचीही माहिती जाणून घेतली.

शिवसेनेचे ज्येष्ठ नेते दत्ता गायकवाड, जिल्हाप्रमुख विजय करंजकर, महानगरप्रमुख सुधाकर बडगुजर, उपनेते सुनील बागूल, माजी आमदार वसंत गिते, माजी महापौर विनायक पांडे, माजी नगरसेवक डी. जी. सूर्यवंशी उपस्थित होते.