नाशिक : (पिंपळगाव बसवंत) निफाड तालुक्यातील कोविडची लक्षणे आढळलेल्या संशयित रुग्णांचे निदान करण्यासाठी पिंपळगाव बसवंत व लासलगाव येथे उभारलेल्या कोरोना केंद्रात स्वॅब (घशातील नमुना) घेण्यासाठी आवश्‍यक असलेले व्हीटीएम तपासणी किटचा तुटवडा निर्माण झाला आहे. तपासणी किट नसल्याने नागरिकांची परवड सुरू असून, तपासणीसाठी खासगी रुग्णालयात अतिरिक्त पैसे मोजावे लागत आहेत. 

नागरिकांची होतेय परवड 

निफाड तालुक्यात कोरोनाचा उद्रेक थांबण्याचे नाव घेत नाहीये. दररोज किमान ३० नवीन रुग्ण आढळून येत आहेत. नागरिकांना या जीवघेण्या संकटापासून वाचविण्यासाठी आरोग्य विभागाचे अधिकारी व कर्मचारी जिवाची बाजी लावत आहेत. सर्वेक्षण करून संशयित नागरिकांना पिंपळगाव बसवंत व लासलगाव येथील तपासणी केंद्रात पाठविले जात आहे. नागरिकही लक्षणे आढळताच स्वयंस्फूर्तीने स्वॅब देण्यासाठी जात आहेत. दररोज सुमारे १५० नागरिकांचे स्वॅब घेतले जात आहेत. पण आठ दिवसांपासून या केंद्रामध्ये तपासणी संचाची समस्या उभी राहिली आहे. 

व्हीटीएम किटचा तुटवडा 

तपासणी केंद्र सुरू झाल्याने नागरिकांची सुरवातीला सोय झाली. पण आठ दिवसांपासून स्वॅब घेण्यासाठी लागणारे व्हीटीएम किट संपलेले आहे. पाठपुराव्यानंतर दिवसाला २५ ते ३० किट मिळतात. यामुळे किमान शंभर नागरिकांना किटअभावी माघारी जावे लागत आहे. तपासणी न झाल्याने नागरिकांना खासगी रुग्णालयात धाव घ्यावी लागत आहे. तेथे तीन ते चार हजार रुपये मोजावे लागत आहेत. 

हेही वाचा > एकीकडे गौराईनिमित्त स्त्रीशक्तीचा जागर; दुसरीकडे 'ती'च नकोशी? चिमुरड्या जीवाला शिक्षा कशासाठी?

किटअभावी तपासणी होत नसल्याने नागरिकांचा मोठ्या प्रमाणात रोष आहे. याबाबत जिल्हा परिषद अध्यक्ष बाळासाहेब क्षीरसागर यांना माहिती दिली आहे. मुबलक किट उपलब्ध करून देण्याचे त्यांनी आश्‍वासन दिले आहे. - राजेश पाटील (सदस्य, पंचायत समिती, निफाड) 

नागरिकांच्या तपासणीची संख्या वाढल्याने किटचा साठा संपला आहे. जिल्हा आरोग्य अधिकारी डॉ. कपिल आहेर यांच्याकडे तपासणी किटची मागणी केली आहे. जिल्हा रुग्णालयातून लवकरच किट उपलब्ध होतील. - डॉ. चेतन काळे (तालुका आरोग्य अधिकारी, निफाड) 
 
माझ्या नातलगांना कोरोनासदृश्‍य आजाराची लक्षणे आहेत. पिंपळगावच्या तपासणी केंद्रात गेलो असता, किट शिल्लक नसल्याने तपासणी झाली नाही. - भाऊसाहेब घुमरे (सदस्य, ग्रामपंचायत, उंबरखेड)  

हेही वाचा > गंभीर! १५ वर्षीय मुलीची बापा विरोधात तक्रार; वेळीच वाचा फोडली म्हणून प्रकार उजेडात

संपादन - किशोरी वाघ