नाशिक/ येवला : सटाणा, नांदगाव, येवला, सिन्नर, पिंपळगाव आदी शहरापासून नाशिक शहरापर्यंत सर्व नियमांचे पालन करून राज्य परिवहन महामंडळातर्फे बससेवा सुरू करण्यात येणार असल्याची माहिती येवला आगारप्रमुख प्रशांत गुंड यांनी दिली.

सिन्नर व पिंपळगाव बसवंत येथून चार बस नाशिकला 

येवला, नांदगाव, सटाणा, येथून रोज दोन बस, तर सिन्नर व पिंपळगाव बसवंत येथून चार बस नाशिकला चालणार आहेत. लॉकडाउन सुरू असल्याने सुरक्षिततेचे सर्व नियम पाळणे प्रवाशांनाही बंधनकारक राहणार आहे. बसमध्ये ज्येष्ठ नागरिक व १२ वर्षांखालील मुलांना प्रवेश मिळणार नसल्याची माहिती आगारप्रमुख प्रशांत गुंड यांनी दिली. येवला, नांदगाव, सटाणा, सिन्नर, पिंपळगाव बसवंत येथून बससेवा सुरू होत असून, सकाळी सात ते सायंकाळी सात या कालावधीतच नागरिकांना बसची सेवा मिळणार आहे.

हेही वाचा > हृदयद्रावक! ताई आता कोण बांधणार गं राखी.. रिकामे मनगट घेऊन भावंड बघताएत वाट

मालवाहतूक सेवेला अपेक्षित प्रतिसाद नाही

जिल्ह्यातील परिवहन महामंडळाची बससेवा २२ मार्चपासून बंद आहे. बससेवा बंद असल्याने सर्व आगारातील आर्थिक चक्रही थांबले आहे. आर्थिक चक्राला गती देण्यासाठी बसमधून मालवाहतूक सेवाही सुरू करण्यात आली होती. मध्यंतरी दोन तालुक्यांमध्ये बससेवा सुरू करण्यात आली होती. मात्र, त्याला अपेक्षित प्रतिसाद मिळाला नाही.

नागरिकांना दिलासा
आता चार महिन्यांनंतर सटाणा, नांदगाव, येवला, सिन्नर, पिंपळगाव आदी शहरांपासून नाशिक शहरापर्यंत बस चालविण्याचा निर्णय घेण्यात आला असून, गुरुवार (ता. ६)पासून त्याची अंमलबजावणी होणार आहे. गुरुवारपासून काही शहरांमध्ये बससेवा सुरू होणार असल्याने जिल्ह्यातील नागरिकांना काही प्रमाणात दिलासा मिळणार आहे.

हेही वाचा > VIDEO : पहिल्याच प्रयत्नात झाला अधिकारी! सामान्‍य रिक्षाचालकाच्या मुलाची उंच भरारी...

रिपोर्ट - संतोष विंचू

संपादन  - ज्योती देवरे