नाशिक : मी चित्रकार असून, लेखक नाही. माझी आवड चित्रकला असून, त्यातच मला रमण्यास आवडते. चित्रकारानंतर मी लेखक झालो आहे. कोणतेही लिखाण ठरवून लिहिले नाही. ओतूर या माझ्या गावाने मला बरंच काही दिले. माझी कला तेथूनच सुरू झाली, असा संवाद साधत चित्रकार, लेखक सुभाष अवचट यांनी समाजातील विविध विषयांवर नाशिककरांशी संवाद साधला. (Subhash Avchat statement No writing written with determination nashik news)

लेखक, चित्रकार सुभाष अवचट यांची खिडकी, दोन दीर्घकथा, डोंट पेंट द क्लू आणि रफ स्केचेस ही चार पुस्तके प्रकाशित झाली आहेत. यानिमित्ताने प्रा. डॉ. वृंदा भार्गवे व पुस्तकांच्या संपादक ज्येष्ठ पत्रकार अपर्णा वेलणकर यांनी कुसुमाग्रज प्रतिष्ठानतर्फे त्यांची शुक्रवारी (ता. २०) मुलाखत घेतली.

सुभाष अवचट यांचे लेखन व चित्रकारिता याबाबतच प्रवास यानिमित्ताने उलगडण्यात आला. अवचट यांनी आपल्या पुस्तकांविषयी माहिती दिली. तसेच चित्रांचे आपल्या आयुष्यातील स्थान, अनिल अवचट या मोठ्या भावाच्या अनेक आठवणींना त्यांनी उजाळा दिला. कार्यक्रमाला माजी आमदार हेमंत टकले, कुसुमाग्रज प्रतिष्ठानचे सल्लागार लोकेश शेवडे, प्रकाशक आनंद अवधानी उपस्थित होते.

हेही वाचा : मेडिकल मॅनेजमेंटही हृदयविकारावर ठरु शकते उपाय

अस्वस्थ वर्तमानावर नेमके बोट

लहान मुलांच्या नजरेसमोर चित्रे नसतात, ते सतत मोबाईलमध्ये गुंतलेले आहेत. हजारो लोकांची बोटे नुसते इकडचे मेसेज तिकडे पाठवण्यात आणि गेम खेळण्यात व्यस्त आहेत.

एखादा चित्रपट एखाद्याला नको असेल, तर त्याच्यावर थेट बहिष्काराची भाषा होते आणि त्याबद्दल कोणाला काही वाटत नाही. हे सगळे काय चालले आहे, असा संताप व्यक्त करत चित्रकार सुभाष अवचट यांनी सध्याच्या अस्वस्थ वर्तमानावर नेमके बोट ठेवले.