नाशिक : शहरात कोरोना रुग्णसंख्या सातत्याने वाढत असून सप्टेंबर अखेरपर्यंत कोरोनाचा रेट दुप्पट होण्याची शक्यता आहे. त्यामुळे तयारीचा भाग म्हणून शहरातील महापालिका, शासकीय व खासगी रुग्णालयांमध्ये ऑक्सिजन पुरवठा होणे महत्वाचे आहे. त्याअनुषंगाने शहरातील ऑक्सिजन पुरवठा करणाऱ्या कंपन्यांना इंडस्ट्रीजऐवजी रुग्णालयांना ऑक्सिजन पुरवठा करण्यास प्राधान्य द्यावे व तशा सूचना अन्न व औषध प्रशासन विभागाने निर्गमित करण्याच्या सूचना महापालिका आयुक्त कैलास जाधव यांनी सोमवारी (ता. 7) दिल्या. 

रुग्णसंख्या दुप्पटीने वाढण्याची शक्यता

शहरात कोरोनच्या रुग्णांची संख्या सातत्याने वाढत आहे. मे महिन्‍यात नियंत्रणात असलेल्या कोरोना संसर्गाने जून, जुलै व ऑगस्ट महिन्यात विक्रमी नोंद करताना नाशिकला हॉटस्पॉट शहरांच्या यादीत बसविले. आता पर्यंत शहरात तीस हजारांहून अधिक कोरोनाबाधित रुग्ण आढळून आले आहेत. बरे होण्याचे प्रमाण ऐंंशी टक्के असले तरी मृतांचा आकडा चिंता वाढविणारा आहे. राज्याच्या आरोग्य विभागाच्या वतीने महापालिकेला प्राप्त झालेल्या अंदाजानुसार रुग्णांची संख्या दुप्पटीने वाढण्याची शक्यता आहे. येत्या पंचवीस दिवसात पन्नास हजारांपर्यंत हा आकडा जाणार असल्याने महापालिकेने रुग्णालये सज्ज करण्याचा निर्णय घेतला त्या अनुषंगाने ऑनलाईन विभाग प्रमुखांच्या बैठकीत आयुक्त जाधव यांनी आढावा घेतला. 

रुग्णालयांमध्ये ऑक्सिजन पुरवठा होणे गरजेचे

शहरात सध्या सहा ते सात किलो लीटर ऑक्सिजनचा पुरवठा होतो. येत्या काही दिवसात पंधरा किलोलीटर पुरवठा लागणार आहे. रुग्णांचे प्रमाण पाच टक्क्यांनी वाढणार असल्याने महापालिकेसह शासकीय व खासगी रुग्णालयांमध्ये ऑक्सिजन पुरवठा होणे गरजेचे आहे. खासगी रुग्णालयांकडून ऑक्सिजनचा तुटवडा जाणवत असल्याच्या तक्रारी प्राप्त झाल्यानंतर आयुक्त जाधव यांनी ऑक्सिजन निर्मिती करणाऱ्या कंपन्यांना प्रथम रुग्णालयांमध्ये पुरवठा करावा त्यानंतर इंडस्ट्रीजला प्राधान्य देण्याच्या सूचना केल्या. 

हेही वाचा > गोणीतून चिमुरड्याचा आवाज येताच ते थबकले...अमानवीय घटनेने नागरिकांत संताप

 ऑक्सिजन पुरवठ्याचा घेणार आढावा 

शहरातील रुग्णालयांमध्ये आतापर्यंत किती ऑक्सिजन पुरवठा झाला. रुग्णालयांमध्ये व्हेंटीलेटरची संख्या, सुस्थितीतील व्हेंटीलेटर व भविष्यात किती प्रमाणात ऑक्सिजन पुरवठा होऊ शकतो याचा आढावा घेऊन वास्तव आकडेवारी समोर मांडण्‍याच्या सूचना वैद्यकीय विभागाला आज देण्यात आल्या. गणेशोत्सवाच्या काळात तब्बल सात हजार रुग्ण वाढ झाल्याने ऑक्सिजनची सज्जता ठेवण्याच्या सूचना देण्यात आल्या. 

हेही वाचा >  ब्रेकिंग : रस्त्यावर प्रसुती झालेल्या बाळंतीण महिलेवर डॉक्टरचा दबाव; "महिला रुग्ण व डॉक्टर" मधील वादग्रस्त संभाषणाचा VIDEO व्हायरल

संपादन - किशोरी वाघ