नाशिक : नाशिक कृषी उत्पन्न बाजार समितीच्या सर्व 18 जागांवर शिवसेनेच्या उद्धव बाळासाहेब ठाकरे गटाचे उमेदवार निवडणूक लढविणार आहे. त्यामुळे आता निवडणुकीतील चुरस अधिक वाढली असून दोन्ही आजी- माजी खासदारांना आव्हान निर्माण होणार आहे. (Thackeray Sena will fight for 18 seats market Market Committee Election nashik news)

शिवसेनेच्या ठाकरे गटाच्या कोर समितीची बैठक उपनेते बबन घोलप यांच्या निवासस्थानी पार पडली. त्या वेळी संपूर्ण ताकदीनिशी कृषी उत्पन्न बाजार समितीच्या निवडणुकीत उतरण्याचा निर्णय घेण्यात आला. सोसायटी गटात ११, ग्रामपंचायत गटात चार, हमाल- मापारी एक तर व्यापारी गटात दोन अशा एकूण १८ जागांसाठी निवडणूक होणार आहे.

निवडणुकीसाठी ग्रामपंचायत गटासाठी २०७० तर सोसायटी गटासाठी एक जार ५९७ असे एकूण तीन हजार ६६७ मतदार आहेत. शिवसेनेकडे पॅनल करण्याइतके सक्षम उमेदवार आहेत. अनेकांनी निवडणूक लढविण्याची इच्छाही दर्शविली.

हेही वाचा : जीएसटीसाठी नोंदणी केलीच नाही तर??

इच्छुकांकडून अर्ज भरून घेण्यात येणार असून, नंतर त्यांची छाननी केली जाईल. मित्र पक्षाशी आघाडी करायची किंवा नाही याबाबतचा अंतिम निर्णय पक्षश्रेष्ठी घेणार असल्याचे उपनेते घोलप यांनी स्पष्ट केले.

शिवसेनेने गेल्यावेळी निवडणूक लढवली होती आणि त्यावेळी सहा उमेदवार निवडून आले होते. मात्र, या वेळी पक्षाला पोषक वातावरण असल्याने त्याचा पुरेपूर लाभ आम्ही उठवू, असे सहसंपर्कप्रमुख दत्ता गायकवाड म्हणाले. बैठकीस जिल्हाप्रमुख विजय करंजकर, महानगरप्रमुख सुधाकर बडगुजर, माजी आमदार वसंत गिते आदी उपस्थित होते.