जुनी शेमळी (जि. नाशिक) : बागलाण तालुक्यातील तीन प्राथमिक शिक्षकांचा आठ दिवसांत कोरोनामुळे मृत्यू झाल्याने त्यांचे कुटुंब कोलमडले आहे. प्रत्यक्ष जाऊन सांत्वन करता येत नसल्याने सोशल मीडियाच्या माध्यमातून शिक्षक दुःख व्यक्त करत आहेत.

तालुक्यात कोरोनाने थैमान घातले असून, दिवसागणिक परिस्थिती गंभीर होत चालली आहे. वाढती रुग्णसंख्या पाहता रुग्णालयांमधील बेड, रेमडेसिव्हिरची कमतरता पाहता आरोग्य सुविधा अपुऱ्या पडू लागल्या आहेत. अनेक कुटुंबांतील सदस्य बाधित होऊन अनेकांचा बळी जात आहे. त्यामुळे कुटुंबे उद्ध्वस्त होत आहेत. आठ दिवसांत मुंजवाड येथील प्राथमिक शिक्षक मुरलीधर पवार (वय ४५), जुने रातीर येथील पोपट शिंदे (५७), सटाणा येथील विजय पगार (४५) यांचा मृत्यू झाला. अर्धवट नोकरी, संसाराचा गाडा चालविणारा व घरातील कमावणारा कर्तबगार मुलगा कोरोनाने हिरावून घेतल्याने हळहळ व्यक्त होत असून, कुटुंबीयांचे अश्रू अनावर झाले आहेत.