नांदगाव (जि. नाशिक) : येथील बाजार समितीच्या आवारात मंगळवारी (ता. १९) दुपारी झाडाखाली उभ्या असलेल्या ‘बर्निंग बाईक’ (Burning Bike) चा थरार बघावयास मिळाला.

बाजार समितीच्या (Market Yard) कार्यालयाजवळ जॉन सुनील वाघ नामक तरुणाने आपली दुचाकी लावली होती. थोड्या वेळेनंतर दुचाकीने अचानक पेट घेतला. दुचाकीला लागलेली आग बघण्यासाठी एकच गर्दी उसळली. मात्र, स्फोट होईल या भीतीमुळे सुरवातीला कोणीही आग विझविण्यासाठी धजवले नाही, पण नंतर टाकीतील पेट्रोल (Petrol) पेट घेण्यापूर्वीच प्रशांत इघे, किरण घुगे या युवकांनी धाडस दाखविले. हातात पाण्याच्या बादल्या घेत पाण्याचा मारा करून आग विझवली. त्यामुळे पुढील अनर्थ टळला. आजही उन्हाची काहिली होती. उष्णतेमुळे दुचाकीला आग लागल्याची चर्चा उपस्थितांमध्ये होती. दुचाकींचा क्रमांक कळू शकला नाही.