नाशिक : पी. एन. मेहता एज्‍युकेशनल ट्रस्‍ट नाशिक संस्‍था संचलित बॉईज टाऊन इंग्‍लिश हायस्‍कूलच्‍या हस्‍तांतरणाचा प्रस्‍ताव रद्द करण्यात आला आहे.

पालकांच्‍या वाढत्‍या विरोधातून हा प्रस्‍ताव रद्द करण्यात आला असल्‍याचे समजते. (Transfer of Boys Town cancelled Both organizations issued joint statement Nashik News)

या संदर्भात पी. एन. मेहता एज्‍युकेशनल ट्रस्‍ट आणि शाळा हस्‍तांतरणासाठीची प्रस्‍तावित संस्‍था असलेल्‍या जालना येथील नूपुर शिक्षण संस्‍था यांनी संयुक्‍तरित्‍या निवेदन जारी केले आहे.

या निवेदनानुसार बॉईज टाऊन इंग्‍लिश हायस्‍कूल या अनुदानित माध्यमिक विद्यालयाचे जालना येथील नूपुर शिक्षण संस्‍था यांना हस्‍तांतरण करण्याचे दोन्‍ही संस्‍थांनी ठरविले होते.

परंतु काही अपरिहार्य कारणास्‍तव सदर हस्‍तांतरण रद्द करण्याचा निर्णय घेतला आहे. शाळेशी निगडित सर्व विद्यार्थी, पालक, शिक्षक व सर्व संबंधित यांनी नोंद घ्यावी, असे नमूद केले आहे.

दरम्‍यान दोनच दिवसांपूर्वी प्रकटन प्रसिद्ध करताना हस्‍तांतरणासंदर्भात हरकती मागविण्यात आल्या होत्‍या. या प्रस्‍तावाला कडाडून विरोध होत असताना कायदेशीर लढाई देण्याची तयारी काही पालकांकडून सुरू झालेली होती.

हरकती नोंदविण्यासाठी पंधरा दिवसांचा अवधी दिलेला असताना, त्‍याआधीच जाहीर निवेदन जारी करताना हस्‍तांतरणाचा प्रस्‍ताव स्‍थगित केल्‍याचे संस्‍थांनी जाहीर केले असून, यामुळे पालकांकडून समाधान व्‍यक्‍त केले जात आहे.