नाशिक : कोरोनारुग्‍णांवर उपचारासाठी वापरल्‍या जाणाऱ्या टॉसिलिझुमॅब इंजेक्‍शनचा तुटवडा जाणवत असला, तरी उपचारासाठी या इंजेक्‍शनचा फारसा वापर होत नाही. अन्‍य इंजेक्‍शन, तसेच ऑक्‍सिजन थेरपीद्वारे रुग्‍णांवर प्रभावी उपचार केले जात असल्‍याची माहिती अतिरिक्‍त जिल्‍हा शल्‍यचिकित्‍सक डॉ. निखिल सैंदाणे यांनी दिली. इंजेक्‍शन उपलब्‍धतेअभावी रुग्‍णांच्‍या नातेवाइकांनी घाबरून जाऊ नये, असे आवाहनही त्‍यांनी केले आहे. 

रुग्‍णाच्‍या नातेवाइकांनी घाबरून जाऊ नये : डॉ. सैंदाणे 
डॉ. सैंदाणे म्‍हणाले, की कोरोनाच्‍या उपचारप्रक्रियेत पहिल्‍या टप्प्‍यात वैद्यकीय निरीक्षणाखाली या इंजेक्‍शनचा वापर सुरू होता; परंतु त्यापेक्षा ऑक्‍सिजन थेरपी व अन्‍य पर्यायी इंजेक्‍शन, औषधे प्रभावी ठरत असल्‍याचे निष्कर्ष निघत होते. या संदर्भात संबंधित इंजेक्‍शन उत्‍पादक कंपनीलाही कळविले होते. सद्यःस्‍थितीत अत्‍यवस्‍थ रुग्‍णांवर प्रभावी उपचार सुरू आहेत. टॉसिलिझुमॅब इंजेक्‍शनऐवजी पर्यायांचा वापर केला जातो आहे. त्‍यामुळे रुग्‍णांच्‍या नातेवाइकांनी घाबरून जाऊ नये. या इंजेक्‍शनची सुधारित आवृत्तीदेखील कंपनीतर्फे उपलब्‍ध केली जाणार असल्‍याचेही त्यांनी या वेळी नमूद केले.  

हेही वाचा > धक्कादायक! कोरोनाबाधित मृतदेह नातेवाईकांना काढून नेण्यास सांगितले; वैद्यकीय अधीक्षकांनी मागविला खुलासा

हेही वाचा > गोणीतून चिमुरड्याचा आवाज येताच ते थबकले...अमानवीय घटनेने नागरिकांत संताप\

संपादन - ज्योती देवरे