ओझर (जि.नाशिक) : दर वर्षीप्रमाणे चंपाषष्ठीनिमित्त भरणारी येथील ग्रामदैवत खंडेराव महाराज यात्रा कोरोना महामारीच्या पार्श्वभूमीवर रद्द झाल्याने विविध व्यवसायांवर बंदी आल्याने कोट्यवधी रुपयांची उलाढाल ठप्प झाली, तर प्रख्यात पारंपरिक बारागाडे ओढण्याचा सोहळा पाहायला इतिहासात पहिल्यांदाच जनसमुदाय मुकला. परंतु अशाही परिस्थितीत मानकरी, यात्रा कमिटी ग्रामस्थ यांनी प्रशासनाला साथ देत यात्रेतील देवाच्या धार्मिक कार्यात खंड पडू न देता सर्व कार्यक्रम पार पाडून तळी आरती, भरीत अन् बाजरीच्या भाकरीचा नैवेद्य दाखून भक्तिभाव जपला. 

सोशल डिस्टन्सिंग राखत ग्रामदैवताचे दर्शन

ओझरला भाविकांनी दर्शन घेत दाखवला भरीत अन् भाकरीचा नैवेद्य 
परंपरागत बारागाडे ओढण्याचा कार्यक्रम रद्द झाल्याने बारागाड्यातील मानाचा मोंढा, गाडा खंडेराव महाराज मंदिराशेजारी लावून भाविकांनी त्याचे दर्शन घेतले. यात्रेनिमित्त येणारी तमाशा मंडळे, रहाट पाळणे, मिठाई, खाऊ, खेळणी यावर बंदचा विपरित परिणाम होऊन व्यावसायिकांचा व्यवसाय बुडाला, तर कुस्तीगीर, मानकरी, हौसे नवसेगवसे यांचा हिमोड झाला. पारंपरिक धार्मिक कार्यक्रम करून भक्तांनी आपली रुढी, परंपरागत संस्कृती जपली. यंदा गेल्या यात्रेपेक्षा यात्रेला उड्डाणपुलाखाली प्रशस्त जागा झाल्याने मोठा प्रतिसाद मिळाला असता दुप्पट यात्रा भरली असती. मात्र महामारीने सर्वांचे स्वप्न भंग केले. पुढील वर्षी हीच यात्रा अलोट गर्दीने फुलेल, असे स्वप्न पाहून सोशल डिस्टन्सिंग राखत अनेकांनी ग्रामदैवताचे दर्शन घेतले. 

हेही वाचा >> मित्राच्या बहिणीच्या लग्नाचा तो सोहळा ठरला अखेरचा; जीवलग मित्राची कायमची ताटातूट ​

पोलिस प्रशासन यांचा ताण कमी 
दर वर्षी यात्रेचे स्वरूप बघता स्थानिक आणि बाहेरील सुरक्षेवर ताण यायचा, यंदा होणारी गर्दी, बारागाड्या ओढण्याच्या वेळी करावी लागणारी धावपळ, कुस्त्यांच्या आखाड्यांसाठी बंदोबस्त आदींचा काही प्रमाणात ताण कमी होऊन नियंत्रण ठेवणे आवाक्यात होते. उड्डाणपुलाच्या दोन्ही बाजूंनी सर्व्हिस रोडवर पोलिस असल्याने पादचाऱ्यांना रस्ता ओलांडताना मदत झाली. 

हेही वाचा >> चार वर्षाच्या चिमुरड्या 'राई'ने जिंकलं सर्वांचं मन! तीन तास नॉनस्टॉप कळसुबाई सर ​