नाशिक : मुकणे धरणातून महापालिकेला पाणीपुरवठा करणाऱ्या पंपिंग स्टेशनवर महावितरण कंपनीकडून शनिवारी (ता. १७) दुरुस्तीचे काम हाती घेतले जाणार आहे. त्यामुळे शनिवार दिवसभर सिडको व पूर्व विभागात पाणीपुरवठा बंद ठेवला जाणार आहे, त्याचप्रमाणे रविवारी (ता. १८) सकाळचा पाणीपुरवठा कमी दाबाने होणार असल्याची माहिती पाणीपुरवठा विभागाकडून देण्यात आली. (Water Management cidco East Division water supply stop on Saturday Nashik news)

हेही वाचा : संयुक्त नावावरील गृहकर्जातून होईल प्राप्तीकराची बचत...

शनिवारी सकाळी नऊ ते संध्याकाळी सहापर्यंत या मुकणे धरणावरील सबस्टेशनचा वीजपुरवठा बंद ठेवला जाणार आहे. त्यामुळे महापालिकेच्या विल्होळी जलशुद्धीकरण केंद्र (मुकणे प्रकल्प) येथून सिडको व नाशिक पूर्व भागात होणारा पाणीपुरवठा करणे शक्य होणार नाही. यामुळे १७ डिसेंबरला सिडको प्रभाग २४, २५, २६, २२ भागश: व २७, २८, २९, ३१ या संपूर्ण प्रभागांचा तसेच नाशिक पूर्वमधील प्रभाग १४, १५, २३, ३० भागश: या प्रभागांमध्ये सकाळ व सायंकाळचा संपूर्ण दिवसभर पाणीपुरवठा होणार नाही. १८ डिसेंबरला दोन्ही विभागांमध्ये कमी दाबाने पाणीपुरवठा होणार आहे.