नाशिक : (म्हसरूळ) दिवसभर आईसोबत भाजीपाला विक्रीचे दुकान सांभाळायचे. वडील हॉटेलात वेटर, त्यामुळे घरची परिस्थिती हलाखीची. घरकामात आईला मदत करायची. कुठला खासगी क्लास नाही. अशा स्थितीत दहावीत ९२ टक्के गुण मिळवीत पंचवटीतील शिवाजी चौकात राहणाऱ्या साक्षी कदम हिने यशाची उत्तुंग भरारी घेतली. 

जिद्द उराशी बाळगून रात्र-दिवस अभ्यास

पंचवटीतील शिवाजी चौकात राहणारी साक्षी शिवाजीराव कदम, वडील हॉटेलमध्ये वेटरचे काम करतात. आई गृहिणी असून, लहान एक भाऊ आणि बहीण असा परिवार. स्वामी विवेकानंद विद्यालयात पाचवीपासून शिक्षण घेत होती. आर्थिक परिस्थिती बेताची. आई-वडिलांवर तीन मुलांचा भार, घर भाड्याचे. दहावीचे वर्ष, कुठलाही क्लास नाही. घरात अडीअडचणी नित्याच्या, घराजवळ आई लावत असलेले भाजीपाला दुकान सांभाळून घरकामात आईस हातभार लावायचा. हे सर्व करून अभ्यासदेखील करायचा. या खडतर जीवनात शिक्षण घेऊनच परिस्थितीवर मात करता येईल ही जिद्द उराशी बाळगून रात्र-दिवस एक करीत ९२ टक्के गुण मिळवत आपल्या शाळेची व आई-वडिलांची मान उंचावली आहे. 

हेही वाचा > घरखर्च भागविण्यासाठी वडिलांसोबत लावले पिको-फॉल...भाग्यश्रीच्या यशाने आईच्या कष्टाला कोंदण! 

उच्चपदस्थ अधिकारी होण्याचा मानस

मला मिळालेले यश आई-वडील व नातेवाईक यांनी दिलेला खंबीर पाठिंबा आहे. सुरवातीपासूनच शिक्षण घेत असताना शिक्षकवृंद व मुख्याध्यापिका चौधरी मॅडमची मिळालेली साथ ही मोलाची आहे. भविष्यात पदवी शिक्षण घेऊन उच्चपदस्थ अधिकारी होण्याचा मानस आहे. - साक्षी कदम  

हेही वाचा > झोळीत असतानाच नियतीने हिरावले पितृछत्र...आज त्याच लेकीच्या यशाने माऊलीच्या होते डोळ्यात आनंदाश्रू

संपादन - किशोरी वाघ