Nashik News : मुंबई-नाशिक महामार्गावरील पिंप्रीसदो चौफुली फाटयावर भर उन्हात शनिवारी (ता.१०) आठवडे बाजार करण्यासाठी रिक्षाची वाट पाहत उभ्या असणाऱ्या दुर्गा वाळू झुगरे (रा. वाकडपाडा) या आदिवासी महिलेला महामार्गावरच प्रसूती कळा सुरु झाल्या. ( woman gave birth to baby on highway nashik news )

जवळच उभे असलेले घोटी टोल नाक्यावरील ग्रुप पेट्रोलिंगच कंट्रोल रूम ऑफिसर समीर चौधरी, गुलाब गवळी, चालक नारायण वळकंदे यांनी या भगिनीची अवस्था पाहून तिला मदत करण्याचा निर्णय घेतला. मात्र तत्पूर्वीच महिलेने महामार्गावरच एका गोंडस बाळाला जन्म दिला.

रूट पेट्रोलिंग टीमच्या कर्मचाऱ्यांनी यानंतर महिलेसह तिच्या बाळाला ग्रामीण रुग्णालयात तातडीने दाखल केले. आई आणि बाळ दोन्ही सुरक्षित असल्याने सोबत असलेल्या नातेवाईकांनी कर्मचाऱ्यांचे आभार मानले. पिंप्रीसदो फाट्यावरून ही आदिवासी महिला नातेवाईकांसोबत इगतपुरी शहराकडे चालली होती.

हेही वाचा : Credit Card फसवणूक....काय घ्याल काळजी?

त्याचवेळी ही घटना घडली. माता आणि बाळ सुरक्षित असल्याची माहिती डॉ. सुशांत श्रीवास्तव व परिचारीका सुमन पगारे यांनी दिली. गरोदर माता व अन्य रूग्णांना कोणत्याही शासन योजना मिळत नसल्याने शहरात खासगी रूग्णालयांचा आधार घ्यावा लागतो.

या घटनेमुळे गरोदर मातांना प्रसूती वेळ व तारीख माहिती होत नाही, यामुळे रस्त्यावर किंवा शेतात बाळाचा जन्म होतो. आदिवासी वाडया पाडया वरील या घटनांचा शासनाने गंभीर विचार करून आरोग्याबाबत ठोस पाऊल उचलून सुविधा पुरविण्याची गरज आहे.