मनमाड (जि. नाशिक) : मनमाड शहर परिसरात गुरुवारी (ता. १५) दोन महिलांचा विजेचा धक्का लागून मृत्यू झाल्याची घटना घडली. यामध्ये एक अल्पवयीन मुलगी, तर २६ वर्षीय महिलेचा समावेश आहे. (Woman minor girl died due to electric shock in manmad Nashik Latest Marathi News)

मनमाडपासून जवळ असलेल्या मनमाड- नांदगाव रोडवरील नागापूर येथील प्रियंका सुनील सोमासे (वय २६) शेतात कामानिमित्त गेल्या असता विद्युत वाहिनीवर पाय पडल्याने त्यांना विजेचा धक्का बसला. त्यात त्यांचा मृत्यू झाला. सदर महिलेला तातडीने मनमाड उपजिल्हा रुग्णालयात दाखल केले असता डॉक्टरांनी मृत घोषित केले.

दुसरी घटना मनमाड- येवला रोडवरील अंकाई (ता. येवला) येथे घडली. सुमैय्या राजू शहा (वय १५) ही मुलगी घरात कपड्यांची इस्त्री करताना तिला अचानकपणे विजेचा धक्का बसला. तिला मनमाड उपजिल्हा रुग्णालयात आणले असता डॉक्टरांनी मृत घोषित केले. या दोन्ही घटनांनी शहर परिसरात हळहळ व्यक्त होत आहे.