नाशिक : लेखक, पर्यावरणवादी कार्यकर्ते आणि आयटी व्यावसायिक राहुल बनसोडे यांचे शुक्रवारी (ता. २४) दुपारी हृदयविकाराने निधन झाले. ते ४५ वर्षांचे होते. त्यांच्यामागे नऊ वर्षांचा मुलगा, एक वर्षाची मुलगी, पत्नी, आई व वडील असा परिवार आहे. त्यांच्या निधनाने साहित्य क्षेत्रावर शोककळा पसरली आहे. (Writer Rahul Bansode passed away Nashik News)

अशोका मार्गावरील रहिवासी असलेले राहुल बनसोडे शुक्रवारी दुपारी आपल्या कार्यालयाच्या पायऱ्या चढत असताना त्यांना त्रास जाणवू लागला. यानंतर त्यांना खासगी रुग्णालयात दाखल करण्यात आले. येथील डॉक्टरांनी तपासणी करून त्यांना मृत घोषित केले.

बनसोडे सॉफ्टवेअर इंजिनिअर क्षेत्रात असले तरी सांस्कृतिक व साहित्य क्षेत्रात त्यांनी भरीव योगदान दिले. त्यांनी ‘अॅप्लिकेशन नेक्सस’ नावाची सॉफ्टवेअर कंपनी स्थापन केली होती, तर आर्टिफिशियल इंटेलिजन्स अर्थात, कृत्रिम बुद्धिमत्ता, दक्षिण आधुनिक व अनॉमिक्स कन्टेन्ट अशी नाटके त्यांनी लिहिली.

हेही वाचा : एका मुलाखतीतून उलगडलेले भैरप्पा!

‘जीवाश्म’, ‘उद्या’, ‘परीचा ड्रेस’ या लघुपटांत त्यांनी मुख्य भूमिका केल्या आहेत. याव्यतिरिक्त पर्यावरण संवर्धनासाठी त्यांनी मोठ्या प्रमाणात योगदान दिले. वर्तमानपत्र तसेच नियतकालिकांसाठी त्यांनी विपुल लेखन केले.

त्यांच्या निधनाची बातमी समजतात साहित्य, सांस्कृतिक क्षेत्रांतील मान्यवरांनी शोकभावना व्यक्त केल्या. राहुल बनसोडे यांच्या पार्थिवावर रात्री उशिरा अंत्यंसंस्कार करण्यात आले. याप्रसंगी विविध क्षेत्रातील मान्यवर, आप्तेष्ट उपस्थित होते.