नाशिक/घोटी : वासाळी (ता. इगतपुरी) प्रॉपर्टीसाठी सख्खी रक्ताचीच नाती एकमेकांचा जीवावर उठली असल्याच्या घटना वाढत आहे. अशीच एक धक्कादायक घटना गुरुवारी (ता. 10) सायंकाळी घडली. जमिनीच्या वादामुळे सततचीच होती कुरकूर. 'जर जमीन देणार नसेल तर तुझा मुडदा पाडतो, तुला जिवंत सोडणार नाही'. अन् नंतर घडले असे...वाचा सविस्तर

अशी आहे घटना

गुरुवारी (ता. 10) सायंकाळी दोघा भावांमध्ये कडाक्याचे भांडण झाले. हिरामण लक्ष्मण खादे (वय 40) व लहान भाऊ लालू लक्ष्मण खादे (वय 36) यांच्यात जमिनीच्या हिस्स्यावरून सतत कुरकूर होत होती. दरम्यान लालू याने 'जर जमीन देणार नसेल तर तुझा मुडदा पाडतो, तुला जिवंत सोडणार नाही' असे ठणकावले होते. यावरून दोघांत झालेल्या भांडणाची आग संशयित आरोपी लालू याच्या डोक्यात खुपत राहिली. त्याने सायंकाळी रागाच्या भरात आपल्या घरातील धारदार कोयत्याने हिरामण याच्या डोक्यात वार करत गंभीर जखमी केले. दरम्यान हिरामण यांची पत्नी लिलाबाई हिने आरडाओरडा करत शेजारी असलेल्या नागरिकांना मदतीसाठी बोलावले नागरिक आल्याचे पाहून संशयित आरोपी फरार झाला. जखमी हिरामण खादे यांस तातडीने उपचारासाठी जिल्हा रुग्णालयात दाखल केले. डोक्यातून अतिरक्तस्त्राव झाल्याने शुक्रवारी साडेबारा वाजता हिरामण यांची उपचारादरम्यान प्राणज्योत मालवली. 

हेही वाचा > आश्चर्यंच! चोवीस तासांत एकाच लॅबमध्ये आला धक्कादायक रिपोर्ट; रुग्णाने सांगितली आपबिती

संशयित आरोपीस अटक

घोटी पोलिसांना याबाबत माहिती मिळताच सहाय्यक पोलीस निरीक्षक जालिंदर पळे उपनिरीक्षक संजय वाघमारे, सहाय्यक उपनिरीक्षक अनिल धुमसे, हवलदार शितलकुमार गायकवाड, गोपनीय गणेश सोनवणे, प्रकाश कासार, राहुल साळवे आपल्या पथकासह घटनास्थळी दाखल झाले. संशयित आरोपीस पोलीस आल्याची माहिती मिळताच पळून जाण्याच्या तयारीत असतांना पथकाने चालाखीने संशयित आरोपी लालू खादे यास झडप घालत अटक केली. वरिष्ठ पातळीवर गंभीर घटनेची दखल घेत नाशिक ग्रामीण विभागीय पोलीस अधिकारी अरुंधती राणे यांनी भेट देत पोलिसांना मार्गदर्शक सूचना केल्या. पुढील तपास सहाय्यक पोलीस निरीक्षक जालिंदर पळे हे करत आहे. 

हेही वाचा > नवनियुक्त आयुक्त दीपक पांडेंपुढे आव्हान! लाच स्वीकारताना पोलीस हवालदारावर एंटी करप्शनची कारवाई

संपादन - किशोरी वाघ