सिडको (जि. नाशिक) : महाकाली चौकात दांडिया मैदानात झालेल्या वादात तरुणाचा पाठलाग करून दशहत माजविल्याचा प्रकार शनिवारी (ता. १) रात्री बाराच्या सुमारास सीसीटीव्ही कॅमेऱ्याद्वारे समोर आल्याने अंबड पोलिस ठाण्याचा वचक पुन्हा चर्चेत आला आहे. (Youth chased by mob in CIDCO nashik Latest Crime News)

अंबड हद्दीत गुन्हेगारीचा आलेख वाढताच असून, अवैध व्यवसाय, मारहाण टोळक्यांकडून दहशत निर्माण करण्याचे प्रकार घडत असूनही पोलिस ॲक्शन मोडमध्ये का येत नाहीत, असा सवाल नागरिक उपस्थित करीत आहेत. महाकाली चौकत दांडियात झालेल्या भांडणात युवकास मारहाण करण्यासाठी २५ ते ३० युवक त्याचा पाठलाग करीत होते.

युवकाने स्वतःचा जीव वाचवण्यासाठी एक घरात आश्रय घेतला. त्यानंतर येथीलच राहणाऱ्यांनी गुंडाना येथून निघून जा, असे सांगितल्यानंतर तो युवक सापडत नसल्याचे बघून ते माघारी फिरले. हा सर्व प्रकार सीसीटीव्ही कॅमेऱ्यामध्ये कैद झाला आहे. मात्र, तो युवक या २५ ते ३० जणांच्या घोळक्याच्या हाती लागला असता तर मात्र नक्कीच अनुचित प्रकार घडला असल्याची भीती नागरिकांनी व्यक्त केली.