नामपूर (जि. नाशिक) : नामपूर- सटाणा रस्त्यालगत असणाऱ्या कांदा व्यापाऱ्याच्या शेडमध्ये क्षुल्लक कारणावरून वायरने गळा आवळून एका तरुणाचा खून झाल्याने एकच खळबळ उडाली. याप्रकरणी जायखेडा पोलिस ठाण्यात खुनाचा गुन्हा दाखल झाला असून, दोन संशयितांना ताब्यात घेतले आहे. (Youth killed in onion traders shed Suspect in custody Nashik Latest Crime News)

नामपूर बाजार समितीचे संचालक, बालाजी ट्रेडिंगचे संचालक प्रतिष्ठित कांदा व्यापारी सचिन मुथा यांच्या कांदा शेडमध्ये कांदा निर्यातीच्या कामासाठी काही परप्रांतीय तरुण कामाला होते. त्यातील मुकादम आणि आणि दोन कामगार यांच्यात दोन हजार रुपयांचा वाद असल्याचे बोलले जात आहे.

त्यातूनच बुधवारी (ता. ५) मध्यरात्रीच्या सुमारास दोन कामगारांनी मुकादम शिवानंद कामत (वय ४१) यांच्याशी हाणामारी करून इलेक्ट्रीक वायरच्या सहाय्याने गळा आवळून त्यांचा खून केला. गुरुवारी (ता. ६) सकाळी खून प्रकरणाचा उलगडा झाला. त्यानंतर कांदा व्यापारी सचिन मुथा यांनी पोलिसांना माहिती दिली. सहाय्यक पोलिस निरीक्षक श्रीकृष्ण पारधी यांनी पोलिस कर्मचाऱ्यांसह तत्काळ घटनास्थळी भेट देऊन विकासकुमार, अनिलकुमार या दोन्ही संशयितांना ताब्यात घेतले आहे.