नंदुरबार : नंदुरबार जिल्हा पोलिस दलातर्फे ३ ते ६ जानेवारीदरम्यान जिल्ह्यात ऑपरेशन ऑलआउट, कोम्बिंग, नाकाबंदी मोहीम राबविण्यात आली.

जिल्हा पोलिस अधीक्षक श्रवण दत्त एस. यांच्या मार्गदर्शनाखाली नंदुरबार जिल्हा पोलिस दलाने जिल्ह्यातील पोलिस ठाणे हद्दीत ऑपरेशन ऑलआउट राबविण्याबाबत नियोजन केले होते.

त्यात अवैध धंद्यांविरुद्ध तसेच पोलिस ठाणे अभिलेखावरील सराईत गुन्हेगार, स्टँडिंग वॉरंट, फरारी, पाहिजे आरोपी, तसेच बेलेबल व नॉन बेलेबल वॉरंट बजावणी या बाबींवर कडक कायदेशीर कारवाई करण्यात आली.

त्यात मोठ्या प्रमाणात गुन्हे व लाखोंचा मुद्देमाल हस्तगत करण्यात आला. नवनियुक्त जिल्हा पोलिस अधीक्षक श्रवण दत्त एस. यांनी पहिल्याच दिवसापासून जिल्ह्यातील अवैध धंद्याविरुद्ध कारवाईचा बडगा उगारताच खळबळ उडाली आहे. (Operation All Out Combing by District Police Force newly appointed District Superintendent of Police from very first day Nandurbar news)

तीन दिवसांचे ऑपरेशन ऑलआउटदरम्यान संपूर्ण जिल्ह्यात पोलिस ठाणे, तसेच स्थानिक गुन्हे अन्वेषण शाखा यांच्यामार्फत करण्यात आलेली कारवाई अशी ः अवैध जुगाराच्या ३३ कारवाया करण्यात आल्या असून, त्यामध्ये ७२ हजार ६८० रुपये किमतीचा मुद्देमाल जप्त करण्यात आला.

अवैधरीत्या दारूची विक्री व वाहतूक करणाऱ्यांविरुद्ध ६१ कारवाया करण्यात आल्या असून, त्यामध्ये ११ लाख एक हजार २७० रुपये किमतीचा मुद्देमाल जप्त करण्यात आला.

पाहिजे, फरारी व स्टँडिंग वॉरंट आरोपींपैकी २९ जणांना अटक करण्यात आली. बेलेबल व नॉन बेलेबल वॉरंट असे एकूण १२४ बजावणी करण्यात यश मिळाले.

अवैधरीत्या घरगुती गॅस सिलिंडर हे वाहनांमध्ये गॅस भरण्याकामी वापरणाऱ्यांविरुद्ध जीवनाश्यक वस्तू कायद्यान्वये कारवाई करून दोन लाख १३ हजार रुपये किमतीचा मुद्देमाल जप्त करून आरोपींविरुद्ध कायदेशीर कारवाई करण्यात आली.

यापुढेदेखील अवैध धंद्यांवर जिल्ह्यात वेळोवेळी कडक कारवाई करण्याच्या पोलिस अधीक्षक श्रवण दत्त. एस यांनी जिल्हा पोलिस दलास सक्त सूचना दिल्या.

"जिल्ह्यात चुकीचे काम होत असेल, सर्वसामान्य जनतेच्या काही अडचणी असल्यास अथवा अवैध-बेकायदा धंद्यांविषयी कुठल्याही प्रकारची माहिती सामान्य नागरिकांना अवगत असल्यास त्यांनी माझ्या ९८४९०६५६२९ या मोबाईल क्रमांकावर तत्काळ कळवावे, ओळख/माहिती गोपनीय ठेवण्यात येईल."-श्रवण दत्त एस., जिल्हा पोलिस अधीक्षक, नंदुरबार