धुळे : शहरातील मोगलाईतील सुदाम पिंगळे मेमोरिअल ट्रस्टच्या श्रीमती शांताबाई पिंगळे प्राथमिक, माध्यमिक व उच्च माध्यमिक विद्यालयाच्या कार्यालयाला महापालिकेच्या करवसुली पथकाने सील ठोकले. महापालिकेचा पाच लाख ८५ हजार २१ रुपयांचा मालमत्ता कर (Tax Recovery) थकविल्याने ही कारवाई करण्यात आली. (Pingle Vidyalaya office sealed by municipal team for property tax collection dhule news)

महापालिकेचे आयुक्त देवीदास टेकाळे, अतिरिक्त आयुक्त नितीन कापडणीस यांनी शहरातील मालमत्ताधारकांकडून थकीत करवसुलीसाठी धडक मोहीम राबविली आहे. यासाठी स्वतंत्र वसुली पथकाची स्थापना करण्यात आली असून, हे पथक बड्या थकबाकीदारांकडे वसुली मोहीम राबवीत आहे.

त्यात गुरुवारी सकाळी श्रीमती शांताबाई पिंगळे प्राथमिक, माध्यमिक व उच्च माध्यमिक विद्यालयाच्या कार्यालयाला वसुली पथकाने थकीत रकमेची मागणी केली. ही रक्कम तत्काळ भरण्यास असमर्थता दर्शविण्यात आल्याने कार्यालयास सील ठोकण्यात आले.

हेही वाचा : जीएसटीसाठी नोंदणी केलीच नाही तर??

पथकातील वसुली अधिकारी शिरीष जाधव, मधुकर निकुंभे, निरीक्षक मनोज चिलंदे, अनिल जोशी, अशोक चौधरी, अशोक सूर्यवंशी, किशोर शिंदे, विद्या करडक, श्रीमती पटाईत यांनी ही कारवाई केली. विद्यालयाकडे गेल्या १२ वर्षांपासून मालमत्ता करापोटी तब्बल पाच लाख ८५ हजार २१ रुपये थकीत होते. मालमत्ताधारकांनी थकीत पाणीपट्टी व मालमत्ता कर भरून महापालिकेला सहकार्य करावे, असे आवाहन आहे.