नाशिक : शहरातील फॅशन स्ट्रीट अशी ओळख असलेल्या कॉलेज रोड परिसरात मोबाईलमध्ये रोलेट, बिंगो जुगार इन्स्टॉल करून त्याच्या खेळातून पॉइंटच्या आधारे पैसे उकळणाऱ्या अड्ड्यावर पोलिसांनी गुरुवारी (ता. 19) छापा टाकला. या प्रकरणी आयुक्तालयाच्या अवैध धंदेविरोधी पथकाने सात जणांविरोधात गुन्हा दाखल करीत सुमारे पाच लाखांचा मुद्देमाल जप्त केला. 

असा घडला प्रकार...

कॉलेज रोडवर श्रद्धा पेट्रोलपंपाशेजारी असलेल्या एस. के. ओपन मॉलच्या तळमजल्यावरील गाळ्यात ऑनलाइन रोलेट जुगारअड्डा सुरू असल्याची खबर अवैध धंदेविरोधी पथकाला मिळाली होती. त्यानुसार पथकाचे सहाय्यक निरीक्षक कुंदन सोनोने यांनी गुरुवारी (ता. 19) सायंकाळी साडेपाचच्या सुमारास सापळा रचून छापा टाकला. त्या वेळी मोबाईल व इंटरनेटच्या माध्यमातून मोबाईल फोनवर बिंगो-रोलेट जुगार इन्स्टॉल करायचे. त्यावर आकड्यावर रोलेट जुगार खेळून त्या गेमच्या पॉइंटवर पैसे लावले जात आणि ते संशयितांकडून वसूल केले जात होते. संशयित जोगंदर ऊर्फ पप्पू शहा जुगाऱ्यांकडून पैसे घेऊन त्यांना पॉइंट देत असल्याचे उघडकीस आले. 

हेही वाचा > video > स्मशानभूमीत केला वाढदिवस साजरा...त्यानंतर अचानक

घटनास्थळावरून पोलिसांनी एक लाख 35 हजार 10 रुपयांची रोकड, वाहन, जुगाराचे साहित्य, मोबाईल असा एकूण चार लाख 89 हजार 770 रुपयांचा मुद्देमाल जप्त केला. या प्रकरणी गंगापूर पोलिसांत गाळामालक पप्पू शहा, राहुल पटेल, जसविंदर सिंग, किरण ढोकळे, कमलेश मंडल, राकेश जाधव, कैलास शहा यांच्याविरोधात गुन्हा दाखल करण्यात आला. ही कामगिरी पथकाचे सहाय्यक पोलिस निरीक्षक कुंदन सोनोने, सहाय्यक उपनिरीक्षक विजय शिरसाठ, पोलिस नाईक सारंग वाघ, पोलिस शिपाई गजानन पवार, सूरज गवळी आणि संतोष वाघ यांच्या पथकाने बजावली. 

हेही वाचा >  शिक्षकाच्या खोलीतून वाफा बाहेर येत होत्या... त्यांनी खिडकीचा कप्पा उघडून पाहिला तर धक्काच!