रावेर - दहावी आणि बारावीच्या परीक्षेत कॉपीमुक्त अभियानाचा राज्यभर फज्जा उडाला आहे. दहावीच्या मराठीच्या पेपरला राज्यात कॉपीची १११ प्रकरणे सापडल्याने ही परीक्षा कॉपीयुक्त होत असल्याचे स्पष्ट झाले आहे. परीक्षा मंडळाने कॉपी रोखण्याचे केलेले उपाय तोकडे पडत असल्याचे स्पष्ट झाले असून, कठोर उपाययोजना करण्याची गरज असल्याचे मत शिक्षण प्रेमी व्यक्त करत आहेत. 

दहावी आणि बारावीच्या परीक्षेला परीक्षा केंद्राबाहेर कॉपी करणाऱ्यांची गर्दी, प्रश्नपत्रिका फोडण्यासाठी आणि उत्तरे सांगण्यासाठी राज्यभरात व्हाट्‌स ॲप आणि मोबाईलचा सर्रास वापर, परीक्षेच्या वेळेआधीच प्रश्नपत्रिका फोडण्याचे प्रकार दुर्दैवाने वाढत चालले आहेत. वरून देखावा कॉपीमुक्त अभियानाचा असला तरी तो पोकळ असल्याचे शिक्षणप्रेमींचे म्हणणे आहे.