Dhule News : स्वातंत्र्य मिळून ७५ वर्षे झाल्यानंतरही साक्री शहरापासून अवघ्या दहा ते बारा किलोमीटरवर असलेल्या विजापूर पाडा या छडवेल (प) (ता. साक्री) ग्रामपंचायत अंतर्गतच्या पाड्यावर अजूनही एसटी बस पोचलेली नव्हती.

त्या पाड्यावर सोमवारी (ता. २३) पहिल्यांदा एसटी बस पोचली. (ST bus reached Bijapur first time after independence dhule news)

पंचायत समितीचे माजी उपसभापती ॲड. नरेंद्र मराठे यांच्या पाठपुराव्यातून ही बस सोमवारपासून सुरू झाली. छडवेल (प.) ता. साक्री ग्रामपंचायत अंतर्गत विजापूर पाडा येथे ७५ वर्षात एसटी बस पोचलेली नव्हती. दळणवळणाची सुविधा निर्माण व्हावी, ग्रामस्थांना तालुक्याच्या ठिकाणी पोचण्यासाठी, विद्यार्थ्यांना शिक्षणासाठी ये-जा करण्यासाठी एसटी बस सुरू करावी, अशी ग्रामस्थांची अनेक वर्षांपासूनची मागणी होती.

या मागणीची दखल घेत या गणाचे पंचायत समिती सदस्य तथा माजी उपसभापती ॲड. नरेंद्र मराठे यांनी वर्षभरापासून या पाड्यावर एसटी बस पोहोचावी यासाठी सातत्याने पाठपुरावा सुरू ठेवला होता. त्यांच्या या पाठपुराव्याला यश येऊन अखेर सोमवारी साक्री-छडवेल-विजापूर ही बस पहिल्यांदा सुरू झाली. साक्री आगारातूनही बस सुटत असताना यावेळी नारळ वाढवून तिचा प्रारंभ करण्यात आला.

ॲड. मराठे, आगारप्रमुख किशोर अहिरराव, विजापूर येथील ग्रामस्थ सदाशिव गोयकर, गोपा सूळ, भटू हलवर, येसा सूळ, भिला कुलाल, भटू सूळ, देवाजी सुळ आदींसह ग्रामस्थ उपस्थित होते. या वेळी ग्रामस्थांनी आनंद व्यक्त केला. यावेळी बसवाहक तसेच चालकांचा सत्कार करण्यात आला. ठिकठिकाणी बसचे स्वागत करण्यात आले. ग्रामस्थांनी उत्साहात या बसमूधन प्रवास केला.

''ग्रामस्थांना ये-जा करण्यासाठी, तसेच विद्यार्थ्यांसाठी एसटी बस सुरू करावी, यासाठी विजापूर येथील ग्रामस्थांची सातत्याने मागणी होत होती. या मागणीच्या अनुषंगाने पाठपुरावा केला असता एसटी प्रशासनाने सहकार्य करत साक्री-छडवेल-विजापूर बससेवा सुरू केली आहे. या बसमुळे विजापूर तसेच या मार्गावरील सर्वच ग्रामस्थ, विद्यार्थ्यांची सोय होणार आहे.''- ॲड. नरेंद्र मराठे, माजी उपसभापती, पंचायत समिती. साक्री