मोताळा (जि.बुलडाणा) : दोन लाख 92 हजारांच्या बनावट नोटांसह दोघांना बोराखेडी पोलिसांनी शिताफीने पकडले. सदर कारवाई सोमवारी (ता.20) पहाटे दोन ते चार वाजताच्या दरम्यान मोताळा-मलकापूर मार्गावरील नळगंगा फाट्यानजीक करण्यात आली. याप्रकरणी पोलिसांनी आरोपी राजेंद्र सदाशिव बोरले व नामदेव फुलसिंग चव्हाण या दोघांविरुद्ध गुन्हा दाखल करून त्यांना अटक केली आहे.

सविस्तर असे की, बोराखेडी पोलिसांनी गुप्त माहितीच्या आधारे पीएसआय अशोक रोकडे यांच्या नेतृत्वात सोमवारी (ता.20) पहाटे 2 वाजताच्या सुमारास मोताळा-मलकापूर मार्गावरील नळगंगा फाट्यानजीक नाकाबंदी केली. दरम्यान, राजेंद्र सदाशिव बोरले (55, रा. जहांगीरपूर ता. मोताळा) व नामदेव फुलसिंग चव्हाण (45, रा. मोरखेड ता. मलकापूर) हे दोघे जण दोन दुचाकीवर मलकापूरकडून मोताळ्याकडे येताना दिसून आले. 

बापरे! - अप्पर जिल्हाधिकारी रिव्हाॅल्वर रोखतात तेव्हा...

दोन लाख 92 हजाराच्या नकली नोटा जप्त
पोलिसांनी त्यांना थांबवून चौकशी केली. दरम्यान, संशय आल्याने पोलिसांनी त्यांची झाडाझडती घेतली असता, दोघांच्या खिशातून भारतीय चलनातील दोन हजार रुपयांच्या 146 बनावट नोटा (दर्शनी किंमत 2 लाख 92 हजार रुपये), पाचशे रुपयांच्या पाच नोटा (किंमत 2500 रुपये), दोन दुचाकी (किंमत 40 हजार रुपये), तीन मोबाईल (किंमत 7 हजार रुपये) असा एकूण 3 लाख 41 हजार रुपयांचा मुद्देमाल हस्तगत केला. आरोपींनी भारतीय चलनातील नकली नोटा उपयोग करण्यासाठी ताब्यात ठेवल्या होत्या. 

क्लिक करा - हृदयविकारला बनविली ताकत, अन् वेटलिफ्टींगमध्ये मिळवले नावलौकीक

बोराखेडी पोलिसांनी केली अटक
बोराखेडी पोलिसांनी उपरोक्त दोघा आरोपींविरुद्ध विविध कलमानुसार गुन्हा दाखल करून अटक केली आहे. दरम्यान, सोमवारी (ता.20) वरिष्ठ पोलिस अधिकाऱ्यांनी बोराखेडी पोलिस ठाणे गाठून आरोपींची कसून चौकशी सुरू केली आहे. या प्रकारामुळे जिल्हाभरात खळबळ उडाली आहे. पुढील तपास बोराखेडीचे पोलिस निरीक्षक माधवराव गरुड यांच्या मार्गदर्शनाखाली एपीआय श्री जंजाळ करीत आहेत.