यवतमाळ : टीव्ही, मोबाईल, सोशल मीडियावर सतत गुंग असलेली आजची पिढी बरीच खुनशी आणि रागीट झाली आहे. गुन्हेगारीच्या वाढत्या घटनांमुळे हीच बाब अधोरेखित होते. शालेय, महाविद्यालयीन विद्यार्थ्यांमध्ये उघडकीस येणाऱ्या गुन्हेगारीच्या घटनांमुळे पालकही चिंतित आहेत. अशीच एक दुर्दैवी घटना यवतमाळ जिल्ह्यात उघडकीस आली. या घटनेमुळे संपूर्ण जिल्ह्यात खळबळ उडाली आहे. 

मिळालेल्या माहितीनुसार, टीव्ही बंद का केला, असा जाब विचारत लहान भावाने मोठ्यावर वासल्याने (छोटी कुऱ्हाड) हल्ला चढवीत त्याचा खून केला. ही घटना कळंब तालुक्‍यातील पिंपळशेंडा येथे आज रविवारी (ता.26) पहाटे दीडच्या सुमारास घडली. दरम्यान, गेल्या चार दिवसांत तीन खुनाच्या घटना घडल्याने कळंब तालुक्‍यात खळबळ उडाली आहे. या खुनातील संशयित विधिसंघर्षग्रस्त बालक असल्याची शक्‍यता पोलिसांनी वर्तविली आहे. 

हेही वाचा - 'ती' म्हणाली, आता तू माझी बायको आणि माझ्या नवऱ्याचीही...
 

असा घडला प्रकार... 

पिंपळशेडा येथे एका कुटुंबात वडील, दोन भाऊ वास्तव्यास आहेत. आज रविवारी दोघे भाऊ रात्री एक वाजेपर्यंत खाटेवर झोपून टीव्ही पाहत होते. रात्री दीडच्या दरम्यान मोठा भाऊ झोपला, असे समजून लहान भावाने टीव्ही बंद केला. टीव्ही का बंद केला, म्हणून मोठ्याने लहान भावाला मारहाण केली व त्याला मारण्यासाठी वासला आणला. लहान्याने वासला त्याच्या हातातून हिसकावून घेतला व भावाच्या मानेवर जोरदार वार केले. त्यात त्याचा जागीच मृत्यू झाला. दोघेही सावत्रभाऊ असल्याचे पोलिसांनी सांगितले. 

पोलिसांचा सर्व बाजूंनी तपास 

सकाळी सहाला पोलिस निरीक्षक विजय राठोड, सहायक पोलिस निरीक्षक राजेश साळवे यांनी घटनास्थळ गाठून संशयिताला ताब्यात घेतले. तो विधिसंघर्षग्रस्त बालक असण्याची शक्‍यता असल्याने त्याचा शाळेचा दाखला (टीसी) मागविण्यात आली आहे. परंतु, शाळा बंद असल्यामुळे मिळू शकली नाही. रविवारी (ता.26) उपविभागीय पोलिस अधिकारी माधुरी बावीस्कर यांनी घटनास्थळाला भेट दिली. पुढील तपास सहायक पोलिस निरीक्षक राजेश साळवे करीत असून, पोलिस सर्वच बाजूंनी तपास करीत आहेत.