तिवसा (जि. अमरावती) : राज्यात अनलॉक पाच होऊनही  मंदिर बंदच असल्याने ते आता सुरू व्हावे यासाठी भाजपकडून राज्यभरातील प्रमुख मंदिरांसमोर आज आंदोलन करण्यात आले. त्याच पार्श्वभूमीवर गुरुकुंज मोझरी येथे तुकडोजी महाराजांच्या समाधीसमोर मंगळवारी भाजपच्या जिल्हाध्यक्ष निवेदिता चौधरी यांच्या नेतृत्वाखाली आंदोलन करून सरकारचे लक्ष वेधले यावेळी दार उघड उद्धवा दार उघड अशा घोषणा भाजपच्या पदाधिकाऱ्यांनी दिल्या.

राज्यांतील सर्व मंदिरे सुरू करावी  ही मागणी भाजप, राष्ट्रीय स्वयंसेवक संघ आदी हिंदुत्ववादी संघटनांनी मागील अनेक दिवसांपासून लावून धरली आहे. राज्यात अनलॉक पाचमध्ये मंदिर उघडण्याचा निर्णय झाला नसल्याने भाजप आक्रमक झाली आहे. गुरुकुंज मोझरी येथेही तुकडोजी महाराज यांच्या समाधी समोर भाजप,विश्व हिंदू परिषद आदींनी आंदोलन केले. 

हेही वाचा - मुंबईहून आली पाहूणी; उडी घेण्यासाठी निवडली गावातली ८० फूट उंच पाण्याची टाकी
 

मंदिर बंद असल्यामुळे हजारो लोकांवर उपासमारीची वेळ आली आहे . ज्या भूमीमध्ये आज आम्ही आंदोलन करत आहे ती राष्ट्रसंत तुकडोजी महाराजांची भूमी आहे. राष्ट्रसंत तुकडोजी महाराजांचा विचार हा जगभरात ग्रामगीतेच्या माध्यमातून पोहोचलेला आहे.

मंदिरे उघडे असते तर आज तुकडोजी महाराज यांना श्रद्धांजली देण्यासाठी देश-विदेशातून लाखो गुरुदेव भक्त आले असते. परंतु, मुख्यमंत्री उद्धव ठाकरे यांच्या एका निर्णयामुळे राष्ट्रसंतांच्या भूमीत नीरव शांतता पसरलेली आहे. त्यामुळे मुख्यमंत्री उद्धव ठाकरे यांनी तत्काळ राज्यभरातील सर्व मंदिरे उघडी करावी, अशी मागणी भाजपाच्या जिल्हाध्यक्ष निवेदिता दिघडे (चौधरी) यांनी केली.