कारंजा (जि.वाशीम) : प्रशासनाने दुपारी दोन वाजेपर्यंत शिथिलता दिल्याने अत्यावश्यक वस्तूंच्या खरेदीसाठी ग्रामीण भागातील नागरिक लगबग करीत असून, वाहतुकीचा प्रश्न निर्माण होऊ नये. म्हणून, दोरखंड बांधण्यात आले आहे. मात्र, हे दोरखंडच अपघातास कारणीभूत ठरून पिता-पुत्र गंभीर जखमी झाले. ही घटना गुरुवारी (ता.7) दुपारच्या सुमारास घडली.

प्राप्त माहितीनुसार, कारंजा तालुक्यातील ग्राम पलाना येथील पिता-पुत्र दुचाकीने (एमएच 37, आर 9510) कारंजाहून कटलरीचा माल घेउन घरी जात होते. मात्र, मार्गातील कारंजा ग्रामीण पोलिस ठाण्याजवळ वाहतूक वळविण्यासाठी पोलिसांनी दोरखंड बांधला. या दोरखंडाला दुचाकी अडकल्याने त्यांचा अपघात झाला. या अपघातात पिता -पुत्र दोघेही गंभीर जखमी झाले. त्यामुळे त्यांना 108 रुग्णवाहिकेने जखमींना उपचाराकरिता कारंजा उपजिल्हा रुग्णालयात दाखल करण्यात आले. 

हेही वाचा - अकोल्याचा मृत्यूदर राज्याच्या दुप्पट!

बिसमिल्ला खॉ नजीर खॉ (वय35) व अरबाज बिसमिल्ला खान (वय 12) असे जखमी बापलेकाचे नाव आहे. या अपघातातील वडिलांच्या गळ्याला जबरदस्त इजा झाली. तर, मुलाचा डोळा निकामी झाला. कारंजा उपजिल्हा रुग्णालयातील प्राथमिक उपचारानंतर जखमींना पुढील उपचारासाठी अमरावती येथे पाठविण्यात आले. दरम्यान, घटनेच्या पोलिसातील नोंदीबाबत अधिक तपशिल प्राप्त होऊ शकला नाही.

आवश्यक वाचा - थरारक : खुली झालेली दारू गेली डोक्यात अन् त्याने दारुच्या नशेत केले हे भयंकर कृत्य

खाकीची माणुसकी
हा अपघात घडल्यानंतर तेथे हजर असलेल्या गणेश जाधव या पोलिस कर्मचार्‍याने जखमींना तत्काळ रुग्णालयामध्ये दाखल केले. यामध्ये त्यांनी स्वतःच्या दुचाकीवर दवाखान्यात नेल्याने या कर्मचार्‍याचे कपडे रक्ताने माखले होते. तसेच ठाणेदार पाटील यांनीही रुग्ण वाहिकेसाठी धावपळ केली.