यवतमाळ : दिग्रस तालुक्‍यातील कोरोबाधित एक व्यक्ती रुग्णवाहिकेने यवतमाळकडे येत असताना त्याचा वाटेतच मृत्यू झाल्याची घटना शनिवारी (ता. 30) सायंकाळी घडली. त्यामुळे रुग्णवाहिका शासकीय वैद्यकीय महाविद्यालयात नेण्यात आली. याठिकाणी पोहोचल्यानंतर काही वेळ वैद्यकीय महाविद्यालयाच्या परिसरात रुग्णवाहिका उभी होती.

भीतीमुळे रुग्णवाहिकेजवळ जाणे टाळळे

कोरोनाच्या भीतीमुळे तसेच मुंबई येथून रुग्णवाहिका आल्याने आरोग्य विभागाच्या कर्मचाऱ्यांनी रुग्णवाहिकेजवळ जाण्याचे टाळले होते. त्यामुळे काही वेळापूर्वी कागदोपत्री कारवाईला सुरुवात झाल्याची माहिती वैद्यकीय महाविद्यालयातील सूत्रांनी दिली आहे. ही व्यक्ती मुंबईतील रुग्णालयात भरती असताना त्याला यवतमाळात रुग्णवाहिकेने येण्याची परवानगी कशी मिळाली, याची चर्चा सुरू होती.

अहवाल आला पॉझिटिव्ह

मात्र त्याचा अहवाल यवतमाळात पोहोचताच पॉझिटिव्ह आल्याचे मुंबईवरून कळविण्यात आले. त्याला मुंबईत व्हेंटिलेटर न मिळाल्याने यवतमाळला आणले असल्याची प्राथमिक माहिती मिळाली आहे. परंतु मुंबई ते यवतमाळ हजारो किलोमीटरचा प्रवास व अनेक जिल्हे ओलांडून ही व्यक्ती यवतमाळपर्यंत कशी पोहोचली, याबाबत नागरिकांमध्ये चर्चा सुरू आहे.

जाणून घ्या : सावधान! आता ग्रामीण भागातही संकट होत आहे गहिरे

प्रशासनाने पाळली गुप्तता

प्रशासनाने अद्याप अधिकृत माहिती दिली नाही. सर्व प्रक्रिया पार पडल्यावर कळविले जाईल, असे सूत्रांनी सांगितले आहे.