अमरावती :  हॉटेल व्यावसायिकाने एका महिलेला लग्नाचे आमिष, तर मुलीच्या लग्नासाठी मदतीचे आश्‍वासन देऊन आठ वर्षांपासून लैंगिक शोषण केल्याचा आरोप पीडितेने केला. राजापेठ पोलिसांनी हॉटेल व्यावसायिकाविरुद्ध अत्याचाराचा गुन्हा दाखल केला.

वाचा - सावधान! सर्वात मोठ्या धरणाचे 33 दरवाजे उघडले.. इतिहासातील सर्वात मोठा पाण्याचा विसर्ग; जिल्ह्यात पुराचा धोका वाढला

संजय रमेश शर्मा (वय 45), असे संशयित आरोपीचे नाव असल्याचे पोलिस निरीक्षक किशोर सूर्यवंशी यांनी सांगितले. पीडित विवाहितेची आर्थिक परिस्थिती बेताचीच असल्याचे ती सदर व्यावसायिकाच्या एका प्रतिष्ठानात काम करीत असताना त्याने तिला लग्नाचे आमिष दाखविले. एवढेच नव्हे तर पीडितेच्या मुलीचे दुसरीकडे लग्न लावून देण्याकरिता मदतीचे आश्‍वासन देऊन अत्याचार केल्याचा आरोप पीडितेने केला. 

महिलेने व्यावसायिकाविरुद्ध तक्रार नोंदविली. प्रकरणी पोलिसांनी मंगळवारी (ता. 26) सायंकाळी गुन्हा दाखल केला. 25 ऑगस्ट रोजी पीडितेच्या मुलाला रात्री दहाच्या सुमारास रस्त्यात अडवून त्याला कुटुंबासह जिवाने मारण्याची धमकीही शर्माने दिल्याचा आरोप पीडितेने तक्रारीत केल्याचे पोलिस निरीक्षक सूर्यवंशी यांनी स्पष्ट केले. 

लॉकडाउनमध्ये हल्ला

अत्याचाराचा गुन्हा दाखल झालेल्या संबंधित हॉटेल व्यावसायिकावर सरोज सिनेमागृहासमोरील एका हॉटेलमध्ये प्राणघातक हल्ला झाला होता. त्यातील हल्लेखोरांना कोतवाली पोलिसांनी अटक केली होती. 

जाणून घ्या - (Video) मस्तच... बोलीभाषेतून शिकविण्याची कला सातासमुद्रापार; लोटपोट होऊन विद्यार्थी करतात ज्ञानार्जन

महिला अत्याचाराशी संबंधित तक्रार असल्याने प्रारंभिक चौकशी केल्यानंतर तातडीने गुन्हा दाखल केला. महिला अधिकाऱ्यांच्या माध्यमातून पीडितेचे बयाणही नोंदविले.
-किशोर सूर्यवंशी,
पोलिस निरीक्षक.

संपादन - अथर्व महांकाळ