शेंदूरजनाबाजार (जि. अमरावती) ः वंदनीय राष्ट्रसंत तुकडोजी महाराज यांना गेल्या १७ वर्षांपासून भारत सरकार ‘भारतरत्न’ देण्याचा निर्णय घेत नसल्यामुळे येत्या गुरुवारी, ५ नोव्हेंबर रोजी गावागावांतून सामाजिक संस्था, संघटना, युवक संघटना व सर्व स्तरांतून पंतप्रधानांना निवेदने पाठविण्यात येणार आहेत. यादिवशी दुपारी ४.५८ मिनिटांनी राष्ट्रसंत तुकडोजी महाराजांना घराघरांतून श्रद्धांजली अर्पण करण्यात येणार आहे. 

निवेदने पाठविण्याचे हे अभियान २० जानेवारी २०२१ पर्यंत सुरू राहणार आहे. वंदनीय राष्ट्रसंत तुकडोजी महाराज यांचे सामाजिक, राष्ट्रीय व विश्‍वव्यापी कार्य लक्षात घेता त्यांना ‘भारतरत्न’ सन्मान त्वरित द्यावा, अशी मागणी सर्वत्र होत आहे. या मागणीची त्वरित दखल घेण्यात यावी, अशी जनसामान्यांची भावना आहे. भारतात साहित्य, समाजसेवा, ज्ञान-विज्ञान, कला, क्रीडा इत्यादी क्षेत्रात विशेष उल्लेखनीय कार्य करणाऱ्या व्यक्ती व संस्थांना ‘भारतरत्न’ सन्मान दिला जातो. मागील वर्षी कुणालाही हा सन्मान देण्यात आला नाही. यापूर्वी किमान ४५ लोकांना हा सन्मान देण्यात आला. दहापेक्षा जास्त व्यक्तींना मरणोत्तर देण्यात आला. 

गाडीवर फॅन्सी नंबरप्लेट लावणाऱ्यांनो सावधान आता तुमच्यावर होणार कडक कारवाई
 

राष्ट्रसंत तुकडोजी महाराज यांना ‘भारतरत्न’ सन्मान मिळावा ही मागणी २००३ पासून सातत्याने सुरू आहे. १७ वर्षांच्या कालावधीत मागील कॉंग्रेस सरकार व आताचे भाजप सरकार या दोन्ही सरकारच्या कार्यकाळात अनेक निवेदने, ठराव, पत्रे जनतेकडून व खासदार, आमदारांकडून गेलेली आहेत.

अमरावती विद्यापीठाचा परीक्षा प्रक्रियेचा निर्णय योग्यच, २४ नोव्हेंबरपर्यंत बाजू मांडण्याचे न्यायालयाचे आदेश

महाराष्ट्र शासनाची शिफारस झाली. या मागणीचा प्रस्ताव पंतप्रधान राष्ट्रपती यांच्याकडे पाठवितात व नंतर घोषणा होते. राष्ट्रसंत तुकडोजी महाराज यांच्यावर प्रेम करणाऱ्या कोट्यवधी लोकांची ही मागणी आहे. त्यावर पंतप्रधानांनी त्वरित निर्णय घ्यावा, यासाठी ५ नोव्हेंबर २०२० ला ही निवेदने पाठविण्यात येत आहेत. राष्ट्रसंत तुकडोजी महाराज युवक विचारमंच महाराष्ट्र राज्याच्या वतीने एका प्रसिद्धी पत्रकाद्वारे ही माहिती कळविण्यात आली आहे. 

संपादन ः राजेंद्र मारोटकर