चंद्रपूर  : बहिणीला त्रास देत असल्याच्या कारणातून संतापलेल्या साळ्याने चक्क भाऊजीचा चाकूने कान कापल्याची घटना येथील श्‍यामनगरात 3 नोव्हेंबरला सायंकाळच्या सुमारास घडली. यात भाऊजी जखमी झाला असून, रुग्णालयात उपचार सुरू आहे. साळ्याविरुद्ध रामनगर पोलिस ठाण्यात गुन्हा दाखल करण्यात आला आहे.

शहरातील श्‍यामनगरात एक कुटुंब राहते. या कुटुंबातील मुलीचे काही वर्षांपूर्वी लग्न झाले. ती पतीसह याच शहरातच राहते. त्यांच्या संसारवेलीवर तीन फुले उमलली. काही वर्षे सुखात गेल्यानंतर आता त्या मुलीला नवऱ्याकडून त्रास सुरू होता. पतीकडून शारीरिक, मानसिक त्रास होत असल्याचे त्या महिलेने माहेरच्या मंडळींना सांगितले. त्यानंतर त्या महिलेचा भाऊ आणि भाऊजी यांच्यात वितुष्ट आले होते.

नक्की वाचा - बापाच्या डोळ्यासमोरच चिमुकली खेळत होती, पण भरधाव वाहन आलं अन् क्षणार्धात होत्याचं नव्हतं झालं

 
यानंतर या महिलेच्या भावाने आपला एका सहकऱ्यासह श्‍यामनगर गाठले. त्यानंतर भाऊजीला तेथे बोलावून घेतले. यावेळी बहिणीला त्रास देण्याच्या कारणातून साळा आणि भाऊजीमध्ये शाब्दिक बाचाबाची झाली. यातून संतापलेल्या साळ्याने भाऊजीला बेदम मारहाण केली. तसेच धारदार चाकूने भाऊजीचा कान कापला. 

या घटनेची तक्रार रामनगर पोलिस ठाण्यात केली. पोलिसांनी घटनास्थळ गाठून पंचनामा केला. जखमीला रुग्णालयात उपचारासाठी दाखल केले. मात्र, घटनेनंतर हल्लेखोर भाऊ पसार होता. त्यानंतर या प्रकरणाचा तपास स्थानिक गुन्हे शाखेकडे सोपविण्यात आला.

स्थानिक गुन्हे शाखेचे पोलिस निरीक्षक बाळासाहेब खाडे यांच्या मार्गदर्शनात संजय आकुलवार, अमजद खान, नितीन रायपुरे, रवींद्र पंधरे यांच्या पथकाने मोठ्या शिताफीने साळ्याला अटक केली. पुढील तपास सुरू आहे. बहिणीला होणाऱ्या त्रासाचा बदला साळ्याने चक्क भाऊजीचा कान कापून घेतल्याच्या घटनेची परिसरात चांगलीच चर्चा आहे.

संपादन  : अतुल मांगे