अमरावती : यंदाच्या खरिपातील नवीन सोयाबीनची आवक बाजार समितीत सुरू झाली असून पहिल्या 10 दिवसात 78 हजार 667 पोत्यांची आवक नोंदवली गेली. दसरा-दिवाळीच्या तोंडावर ही आवक होत असून हमीभावापेक्षा कमी भाव सध्या मिळत आहे. त्यामुळे शेतकऱ्यांना हमीभावाची हमी नसल्याचे चित्र आहे. आर्थिक निकडीपायी शेतकऱ्यांनी त्यातही समाधान मानले आहे. सोमवारी (ता.12)मात्र सोयाबीनचे भाव हमीभावाच्या तुलनेत वीस रूपयांनी वधारले. 

खरिपातील सोयाबीनची कापणी व मळणी सुरू आहे. काही शेतकऱ्यांनी आधीच मळणी केलेला सोयाबीन बाजारात आणल्याने या महिन्याच्या प्रारंभी सोयाबीनचा हंगाम सुरू झाला. यंदा पावसाने सोयाबीनचे पीक उद्‌ध्वस्त केल्याने उत्पादनाची सरासरी घसरली आहे. कृषी विभागाकडून उत्पादनाची सरासरी काढण्यासाठी पीक कापणीचे प्रयोग सुरू असून त्यात परतीच्या पावसाचा व्यत्यय येत असल्याचे जिल्हा अधीक्षक कृषी अधिकारी विजय चवाळे यांनी सांगितले. मात्र, ज्या शेतकऱ्यांनी बाजार समितीत शेतमाल विकण्यासाठी आणला त्यांनी एकरी दोन ते तीन पोत्यांची सरासरी असल्याचे म्हटले आहे. सध्या सुरू असलेल्या कापणीवर परतीच्या पावसाचे ढग आहेत. 

हेही वाचा - शिवसैनिक म्हणाले, 'ही' तर राणा दाम्पत्याची नौंटकी

दरम्यान, एक ऑक्‍टोबरपासून अमरावती कृषी उत्पन्न बाजार समितीत नव्या सोयाबीनची आवक सुरू झाली आहे. महिन्याच्या पहिल्या दिवशी (ता. एक)3385 पोत्यांची आवक झाली. ती तिसऱ्या दिवशी वाढली व तब्बल 11 हजार 8 पोत्यांची आवक नोंदविली गेली. 3500 ते 3600 रुपये भाव मिळाला. दुसऱ्या सप्ताहात खुललेल्या बाजारात पाच ऑक्‍टोबरपासून आवकमध्ये वाढ नोंदविली गेली. 

हेही वाचा - अतिपावसाने कपाशी, सोयाबीनचे पीक झाले खराब म्हणून शेतकऱ्याने विहिरीत उडी घेऊन केली आत्महत्या

दररोज 10 हजारांहून अधिक पोते बाजारात येऊ लागले आहेत. गेल्या दहा दिवसांतील आवक बघता दररोज त्यामध्ये वाढ होत असल्याचे निदर्शनास येत असले तरी हमीभावाने मात्र एकाही दिवशी खरेदी झालेली नाही. 10 ऑक्‍टोबरला सुपर प्रतीच्या सोयाबीनला 3800 रुपयांपर्यंत, तर सर्वसाधारण प्रतीच्या सोयाबीनला 3500 रुपये भाव मिळाला. सोमवारी भाव हमीदराच्या तुलनेत वीस रुपयांनी वधारले होते. 

प्रत खालावल्याचे कारण -
केंद्राने सोयाबीनला 3880 रुपये हमीभाव जाहीर केला आहे. यंदा उत्पादन कमी होण्याचा अंदाज असतानाच हमीभावाची हमी मात्र नाही. खुल्या बाजारात सध्या मिळतेजुळते भाव मिळू लागले आहेत. पावसामुळे सोयाबीनची प्रत खालावल्याचे कारण समोर करण्यात येऊ लागले आहे.