वर्धा : सोयाबीनला हमी भाव मिळावा यासाठी शासनाने निर्णय घेत लवकरच नाफेडमार्फत खरेदी करण्याच्या सूचना दिल्या. नेहमी खरेदी केंद्र सुरू होण्याची वाट पाहावी लागत होती. मात्र, यंदा १५ ऑक्टोबरपासूनच खरेदी सुरू झाली. पण, अद्याप एकही शेतकरी सोयाबीन घेऊन दाखल झाला नाही. त्यामुळे नाफे़ला मुहुर्तालाही सोयाबीन मिळाले नाही.

जिल्ह्यात नाफेडची एकूण दहा केंद्रे आहेत. यामध्ये सात केंद्र जिल्हा मार्केटींग कार्यालय आणि तीन केंद्र विदर्भ मार्केटींग फेडरेशन सांभाळणार आहे. यात आर्वी, सिंदी आणि सेलूचा समावेश आहे, तर हिंगणघाट, समुद्रपूर, वर्धा, देवळी, पुलगाव, आष्टी आणि कारंजाचे काम मार्केटिंग कार्यालयाकडे देण्यात आले आहे. मार्केटिंग कार्यालयात झालेल्या अतापर्यंत 857 शेतकऱ्यांनी नोंदणी केली आहे. पण एकानेही या केंद्रावर सोयाबीन दिले नाही. 

हेही वाचा - डोक्यावर पदर, ना पाहुण्यांच्या बैठकीत जाण्याची मुभा; तरीही देशमुख घराण्यातील महिला सायकल दुरुस्ती...

यंदा आलेल्या किडीमुळे आणि सततच्या पावसामुळे सोयाबीनची उतारी कमी आली. बऱ्याच शेतकऱ्यांनी सोयाबीनची काढणी करण्याऐवजी त्यावर ट्रॅक्‍टर चालविले, तर ज्यांनी काढले त्यांना एकरी दोन ते तीन पोते सरासरी उत्पादन झाले. अनेक शेतकऱ्यांचे सोयाबीन शेतातच सडले. ते सडके सोयाबीन घेऊन शेतकरी बाजारात आले असता त्यांना व्यापाऱ्यांकडून हजार ते दीड हजार रुपये दर दिला जात आहे. 

शेतकऱ्यांना बाजारात अधिक दर - 
शासनाकडून सोयाबीनला मिळणाऱ्या दराच्या तुलनेत बाजारात अधिक भाव मिळतोय. यामुळे शासकीय खरेदीला पाठ दाखवून शेतकऱ्यांनी बाजारात धाव घेतली आहे. येथे सोयाबीनला चार ते साडेचार हजार रुपये दर मिळत आहे. शिवाय खराब सोयाबीन घेण्यास नाफेड तयार नाही. यामुळे शेतकऱ्यांचा कल बाजार समितीकडे आहे. 

हेही वाचा - बर्थडे बॉयचे असेही नशीब; अर्थे सेलीब्रेशन घरी उर्वरित पोलिस ठाण्यातील लॉकअपमध्ये

माझ्याकडे आठ एकर शेती आहे. या आठ एकरात 12 पोते सोयाबीन झाले. सरासरी विचार केल्यास एकरी दीड पोते होतात. ते काढण्याचाही खर्च निघत नाही. यात बाजारात असलेल्या अधिक दरामुळे तिथेच सोयाबीन विकण्याचा निर्णय घेतला. 
-गौरव मेघे, शेतकरी, सेलसुरा