लाखांदूर (जि. भंडारा) : शिकारीच्या शोधात भटकलेल्या एका 4 ते 5 वर्षीय पट्टेदार वाघाने मोहरणा शिवारातील नाल्याजवळ झुडपात ठिय्या मांडल्याचे मंगळवारी सकाळी उघडकीस झाले आहे. त्यानंतर अनुचित घटना टाळण्यासाठी परिसरात वन कर्मचारी व पोलिसांचा चोख बंदोबस्त ठेवून वाघाच्या हालचालीवर लक्ष ठेवले जात आहे. यामुळे गावकरी आणि शेतात कामावर जाणाऱ्या मजुरांमध्ये भीती निर्माण झाली आहे.

तालुक्‍यातील मोहरणा नजीकच्या प्रशांत राऊत यांच्या शेताकडे मंगळवारी सकाळी काही नागरिक फिरायला गेले होते. त्यांना नाल्याजवळील झुडपात पट्‌टेदार वाघ बसलेला आढळून आला. याची माहिती मिळाल्यावर संपूर्ण गावात भीतीचे वातावरण निर्माण झाल्याने लाखांदूर येथील वनविभागाला माहिती देण्यात आली. त्यावरून वनपरिक्षेत्र अधिकारी रूपेश गावित, वनरक्षक एस. जी. खंडागळे, जी. डी. हाते, प्रफुल्ल राऊत आदींनी घटनास्थळी येऊन पाहणी केली.

 हेही वाचा - पोलिसांना जंगलात दिसले भांडे, भाजीपाला, राशन; आत...

दरम्यान, वाघाला पाहण्यासाठी गावकऱ्यांसह शेजारच्या गावातील नागरिकांची चांगलीच गर्दी झाली. मोहरणा येथे गर्दी वाढत असल्याने अनुचित घटना टाळण्यासाठी लाखांदूर पोलिसांना पाचारण करण्यात आले. येथे आलेला पट्‌टेदार वाघ अंदाजे चार ते पाच वर्षे वयोगटातील असून शिकारीच्या शोधात वैनगंगा नदीपलीकडून आला असावा असा अंदाज वर्तविल्या जात आहे.मोहरणा शिवारात वाघ दिसून आल्याने परिसरात भीतीचे वातावरण निर्माण झाले आहे. 

या भागात रब्बी पीक काढणी व उन्हाळी धान रोवणीची कामे सुरू आहेत. त्यामुळे शेतकरी व मजूर दिवसभर शेतात असतात. मात्र, आता वाघाच्या हजेरीने शेतकरी वर्गात दहशत निर्माण झाली आहे. या परिसरात 10 वर्षांपूर्वी एका वाघाने शिरकाव करून किरमटी येथे बैलाची शिकार केली होती. आता दहा वर्षानंतर पुन्हा पट्‌टेदार वाघ आढळल्याने त्याबाबत चर्चांना ऊत आला आहे.

हेही वाचा - विभक्त राहत असलेली पत्नी हरविल्याची तक्रार दिली पतीने; पोलिस तपासात पुढे आहे भयान सत्य

मचाण बांधून वन कर्मचाऱ्यांची गस्त

मोहरणा शिवारात दिवसभर ठिय्या मांडून बसलेल्या वाघावर लक्ष ठेवण्यासाठी लाखांदूर वनविभागाचे अधिकारी व कर्मचाऱ्यांनी मचाण बांधून रात्रभर गस्त सुरू केली आहे. हा वाघ मंगळवारी दिवसभर शेतालगतच्या नाल्यातील झुडपात दडी मारून बसला होता.

तो रात्रीच्या सुमारास शिकारीच्या बाहेर आल्यास कोणतीही अनुचित घटना घडू नये यासाठी सतर्कतेची उपाय योजना म्हणून वन कर्मचाऱ्यांनी शेतात मचाण बांधून रात्रभर गस्त सुरू केली. शेतात उन्हाळी धान रोवणीची कामे सुरू असल्याने रात्रीच्या सुमारास कृषी पंप सुरू करण्यासाठी शेतकरी शेतात जातात. त्यांना वाघापासून संभाव्य धोका टाळण्यासाठी शेतकऱ्यांना सतर्कतेचे आवाहन करण्यात आले आहे.

संपादन - अथर्व महांकाळ