शेंबाळपिंपरी (जि. यवतमाळ) : येथील ग्रामपंचायतीच्या 17 जागांसाठी होत असलेल्या मतदानाला हिसेंचे गालबोट लागले. जिल्हा परिषदेच्या उर्दू शाळेत गावातील प्रभाग क्रमांक तीन, चार, पाच व सहा या वॉर्डांमधील सदस्य निवडीसाठी मतदान सुरू असताना प्रभाग चारच्या मतदान केंद्रावर मतदानासाठी उभ्या असलेल्या व्यक्तीला धक्का मारल्याच्या कारणांवरून दोन गटात हाणामारी झाली. त्यामुळे जमावाला पांगविण्यासाठी पोलिसांना सौम्य लाठीचार्ज करावा लागला.
एकाच इमारतीत चार मतदान केंद्र असल्यामुळे मतदान करण्यासाठी मतदारांची संख्याही मोठी होती. त्यामुळे अचानक झालेल्या या हाणामारीने एकच गोंधळ उडाला. आवारातील जमावाला पांगवण्यासाठी पोलिसांना सौम्य लाठीमारही करावा लागला.
सदरील केंद्र अतिसंवेदनशील म्हणून नोंद असून, पुरेसा पोलिस बंदोबस्तही तैनात होता. परंतु, मतदानाच्या प्रारंभापासूनच मतदारांव्यतिरिक्त इतर लोकांचा संचार जास्त होता. अचानक उद्भवलेल्या या परिस्थितीत पोलिसांच्या वेळीच हस्तक्षेपामुळे मोठा अनर्थ टळला.
परंतु, मतदारांची झालेली धावपळ पाहता अनेकांनी मतदान न करताच घर गाठले. राखीव पोलिस बलाचे जवान बंदोबस्तावर आहेत. वृत्तलिहेस्तोवर पोलिसांकडून कुणावरही कारवाई करण्यात आलेली नव्हती.
संपादन - अथर्व महांकाळ
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.