भंडारा : पंधरा ते वीस दिवसांवर दिवाली येऊन ठेपली आहे. यामुळे जिथे तिथे मोठ्या प्रमाणात फटाक्याचे दुकान थाटले जात आहे. यामुळे आगीचा धोकाही वाढला आहे. अशीच एक घटना भंडारा जिल्ह्यातील लाखनी तालुक्यातील सिंधी लाईन येथे घडली. येथील दोन फटाका सेंटरला मध्यरात्री भीषण आग लागली. यात दोन्ही दुकाने जळून खाक झाली. सुदैवाने कोणत्याही प्रकारची जीवितहानी झाली नाही.

शहरातील सिंधी लाईन परिसरातील फटाका सेंटरला मध्यरात्री १२ वाजताच्या सुमारास अचानक आग लागली. फटाका सेंटर असल्यामुळे अवघ्या काही क्षणात आगीने रौद्ररूप धारण केले. आगीच्या लोटात फटका सेंटरच्या बाजूला असलेल्या फुलाच्या दुकालाही आग लागली. यात दुकान संपूर्ण जळून खाक झाले आहे.

अधिक माहितीसाठी - ...अन् शोकाकुळ नातेवाईक मृतदेह विसाव्यावर सोडून सैरावैरा पळू लागले

आगीची माहिती तत्काळ अग्निशमन दलाला देण्यात आली. त्यानंतर लाखनी नगर परिषदेच्या अग्निशमन दलाने घटनास्थळी धाव घेतली. अग्निशमन दलाच्या जवानांनी काही वेळात आगीवर नियंत्रण मिळवले. आग विझवण्यात जवानांना यश आले. यात दोन्ही दुकानांचे जवळपास पाच लाखांचे नुकसान झाल्याचा अंदाज आहे.

आवाजाने परिसर दणाणला

ही आग मध्यरात्रीच्या सुमारास लागली. यावेळी दुकानात आणि परिसरात कुणीही नव्हते. त्यामुळे जीवितहानी झाली नाही. फटाका दुकानाला आग लागल्यामुळे दुकानातील फटाक्यांच्या आवाजाने परिसर दणाणून गेला होता. त्यामुळे दुकानाच्या शेजारी राहणाऱ्या नागरिकांनी घराच्या बाहेर पडावे लागले होते. ही आग शार्टसर्किटने लागल्याच्या अंदाज वर्तवण्यात येत आहे.

संपादन - नीलेश डाखोरे